Klart alkoholråd til foreldre i ferien

På sommaren er mange ting annleis for barna. Dei er gjerne på ferie ein stad dei ikkje har vore før, med folk dei ikkje kjenner.

Då er det viktig at vaksne drikk med måte og bidrar til å skape tryggleik, meiner alkovettorganisasjonen Av-og-til.

I ei undersøking gjennomført av Ipsos fortel ein av tre foreldre at dei har vore brisne føre barna sine. Samtidig ser vi at nordmenn aukar alkoholforbruket om sommaren.

– Det er ein uheldig kombinasjon med meir alkohol, og meir tid med eigne og andres born, seier generalsekretær Ragnhild Kaski.

– Trur ikkje barn blir påverka

Tala frå Ipsos viser at fleire fedrar (36 prosent) har vore brisne enn mødrer (27 prosent). Samtidig seier fleire menn at dei ikkje trur barn blir påverka av at dei drikk 3 eller fleire einingar.

– Vi veit at menn drikk oftare og meir enn kvinner. Derfor er det viktig å oppfordre fedrar til å vere bevisste på eiget alkoholinntak rundt unge, seier Kaski.

ALKOVETT: Kaski håpar at fleire foreldre vil reflektere rundt eiga alkoholbruk. Foto: Thomas Brun

Dei rår alle foreldre til å enten ikkje drikke, eller avgrense seg til maks to glas føre barna. Det er barn flest einige i.

I ein eiga undersøking blei barna sjølv spurt kor mykje dei tenker foreldre kan drikke. Der seier 25 prosent av barn null glas, 22 prosent eitt glas, og 22 prosent to glas. 

Tenåringar svarar at dei oftare opplev at foreldra drikk alkohol, men dei ynskjer òg at foreldre skal avgrense alkoholinntaket. 

– Dei kan bli flaue over at foreldra oppfører seg annleis, seier ho.

– Salet følger vêrmeldinga

Vinmonopolet fortel til TV 2 at dei opplever ei salsauke om sommaren.

– Våre største salsmånadar er mai og desember, men òg i løpet av sommaren aukar salet samanlikna med resten av året, seier kommunikasjonsrådgjevar Kristine Sanne.

AUKE: Nordmenn kjøpar meir drikke når det er fint vær, ifølgje Sanne. Foto: Ellen Johanne Jarli

Ho fortel at dei særleg omset mykje lys og lett drikke.

– Faktisk er det nesten som salet følger vêrmeldinga om sommaren, legg ho til.

– Anna kultur i utlandet

Men ikkje alle nordmenn blir heime: Mange drar på sommarferie til utlandet.

Sissel Myklebust Mæland, kommunikasjonssjef i Sjømannskirken, bekreftar at dei opplever at enkelte nordmenn på ferie drikk meir enn dei kanskje gjer til dagleg. Det gjeld også rundt barn.

– Vi ser at terskelen for å drikke alkohol saman med barna blir senka når det er ferie. Nokre barn fortel at dei gruar seg til ferien, og blir urolege når dei tenkjer på at dei skal reise vekk frå dei trygge rammene, seier ho.

PÅVERKA: Nokre nordmenn kan drikke meir på ferie enn vanleg, ifølgje Mæland. Foto: Sjømannskirken

Ho trur nordmenn blir påverka av at det er ein annleis kultur i utlandet. I tillegg senkar nordmenn «guarden» når dei er på ferie.

– Vår erfaring er at Spanjolar generelt avgrensar seg til eit glas eller to til maten, mens vi nordmenn oftare inntar større mengder, fortel ho. 

Vanskeleg å seie nei

Ragnhild Kaski meiner mange forbind alkohol og ferie med kvarandre. 

– Det er ei forventning hos mange at om du har fri så må alkohol inngå i det. Det kan vere vanskeleg å seie nei, og bestemme seg for å la vere å drikke, seier ho.

Ho understrekar at sjølv om vaksne ikkje opplev andre brisne vaksne som ubehagelege, så kan det sjå annleis ut med barneauge.

– Det blir høgare latter, meir intens snakking, vi forandrar oss. Det kan opplevast som rart at mamma eller pappa ikkje er slik dei brukar å vere, avsluttar ho.