Karpe varslar tre konsertar neste sommar

På kontoen sin har Magdi Omar Ytreeide Abdelmaguid og Chirag Rashmikant Patel no publisert eit animert bilete av ein stor utandørskonsert på Ekebergsletta.

Til biletet har dei skrive torsdag 09:00 www.karpeworld.com i kommentarfeltet. Det blir tolka som at billettane blir tilgjengelege då.

– Håper på ny musikk

– Vi kan ikkje røpe for mange detaljar på dette tidspunktet, men kan love at det blir ei heilt unik oppleving på Ekeberg neste sommar, seier manager Silje Larsen Borgan til NRK.

Ho legg til at som ein ser på plakaten, blir det innhald frå fleire tidlegare prosjekt på konsertane.

– Personleg håpar eg på ny musikk òg, seier Borgan.

Spekulasjonane starta allereie måndag morgon då alle innlegga på Instagram-kontoen til rapduoen Karpe var borte.

Måndag dukka det opp ein video av ei jente og ein mann i eit helikopter som flyg over eit skogområde. Utanfor passerer det oppblåsbare grisar og pengar, før dei ser ned på noko som liknar ein utandørs gigantkonsert.

I kommentarfeltet skreiv Karpe: «Mykje å oppdage i skogen i Oslo». Det gjorde at enkelte tenkte det kunne komme nytt album, eller at dei planla ein stor friluftskonsert i skogen.

Kjent for store lanseringar

Gruppa har det siste tiåret gjort det for vane å gjere noko spesielt når dei skal ha lansering.

Som «Heisann Montebello»-prosjektet som var ni låtar med tilhøyrande musikkvideoar, som blei gjeve ut mellom 2015 og 2017.

Prosjektet enda opp med tre konsertar i Oslo Spektrum og ein kinofilm «Adjø Montobello».

Albumet «SAS PLUS/SAS PUSSY» frå 2019 blei gjeve ut som eitt samanhengande spor på 30 minutt. Medan EP-en «Omar Sheriff» frå 2022 blei lansert saman med eit filmklipp som gjekk i loop.

Og i 2022 selde dei også ut Oslo Spektrum ti gongar.