Høyrde skrika etter kollisjonen – då stakk dei av

Fire menn i 20-åra møtte i Sogn og Fjordane tingrett tidlegare i haust. 

Der var dei tiltalte for grovt skadeverk og brot på vegtrafikklova, i ei sak som har vekt merksemd.

Årsaka er at dei fire mennene har erkjent å ha vore med på å felle fleire tre ned på ulike vegar i Kinn kommune i Vestland.

Det siste og mest alvorlege tilfellet skjedde på riksveg 5 mellom Florø og Førde i mars.

Mennene brukte ei motorsag, som dei fekk ein idé om å teste. Over vegen, 80-sona, felte dei eit stort tre som sperra vegbana.

– Vi ville sjå reaksjonane til bilistane som møtte på hindringane. Vi tenkte ikkje over at det var eit faremoment at bilane kunne krasje, forklarte ein av dei tiltalte i retten.

Kunne høyre skrik

Men nettopp det skjedde på riksveg 5 i mars.

To bilar køyrde rett inn i eitt av dei felte trea. Ein tredje bil klarte å svinge unna, men hamna i grøfta.

OVER VEGEN: Slik såg ein av trefellingane i vinter ut. Foto: Politiet

Fem personar måtte til sjukehus for behandling etter krasjane. Totalt elleve personar var involvert i dei tre bilane som anten køyrde i treet eller i grøfta.

– Dei forklarte at dei kunne høyre skrik frå fleire personar og at skrika kom frå den eine bilen. Då stakk dei frå staden. Motorsaga vart kasta i sjøen, samanfattar Sogn og Fjordane tingrett i den dagsferske dommen.

Dømde

Der blir dei unge mennene dømde til fengselsstraff:

To av mennene får 1 år og ein månad i fengsel og tap av førarkort i to år.

Ein tredje mann blir dømd til åtte månader i fengsel og tap av førarkort i to år

 Den siste får 90 dagar i fengsel. 

I tillegg må dei tre som har fått den lengste straffa betale 315.000 kr i erstatning. 

Det var NRK som omtala dommen først. Dei skriv at alle vurderer å anke.

Kunne enda fatalt

I mars i år skjedde det også fleire trefellingar, med overlegg, i Danmark. 

I eitt av tilfella enda det med at ein 55 år gamal bilist mista livet etter å ha kollidert med eitt av dei.

Også i Noreg meiner retten at leiken i Kinn kommune kunne enda fatalt.

– Handlingane vart gjennomført utelukkande for å more dei tiltalte, som ved sine handlingar leika med andre trafikantars liv og helse, står det i dommen.