Her skal ein gut ha blitt utsett for eitt av mange seksuelle overgrep – og fått sprit og pengar

– Dei to som sit her har vore med og øydelagt mitt barn.

Det sa ei sterkt prega kvinne då ho tok plass i vitneboksen i Haugaland og Sunnhordland tingrett før påske.

Ho er mor til ein gut som er fornærma i ei overgrepssak som gjekk for retten.

På tiltalebenken sat to menn frå Vestlandet, ein i 40-åra og ein i 60-åra.

Dei er begge tiltalte for seksuell omgang mot barn mellom 14 og 16 år.

Påtalemakta meiner omgangen er grov sidan det er utført av begge i fellesskap.

Offeret er ein gut som enno ikkje er myndig.

Begge tiltalte har erkjent straffskuld etter tiltalen.

Fornærma si mor: – Det er ikkje frivillig når det er barn

Saka har prega mor til guten så sterkt at ho i retten gav uttrykk for sterkt ubehag over å sitja i same rom som dei to tiltalte.

– De har behandla han som sexleiketøyet dykkar. Gitt han sprit. Det er ikkje frivillig når det er barn inne i biletet, sa ho.

Den vaksne kvinna unnskylda seg, men sa ho var så forbanna over det som hadde skjedd at ho nesten ikkje hadde ord.

Dette var nemleg ikkje den første rettssaka der menn må svara for overgrep mot sonen hennar.

Aktor: – Stakkars gut

I fjor haust vart ein tidlegare politikarar dømd til fengsel for overgrep mot den same guten.

Utover våren skal fleire saker opp, og familien skal vera til stades i alle.

Til saman er seks menn tiltalte for overgrep mot guten, ifølgje Bergens Tidende.

Blant anna er ein mann i 60-åra tiltalt for fleire overgrep på eit hotellrom. Belønninga skal ha vore sprit, pengar og sigarettar.

Så mange som 19 menn skal ha vore på ei mistenkt-liste etter at saka vart politimeldt i 2023.

Fleire saker er framleis under etterforsking.

Aktor i den siste saka, statsadvokat Folke Åmlid, kallar det uvanleg og spesielt at så mange menn skal ha gjort overgrep mot same gut.

– Dette trekkjer tankane i ei retning av sjølvdestruktiv åtferd, og at det har gjort det som har skjedd mogleg, seier han.

Under sin prosedyre sa Åmlid «Stakkars gut.»

– Dette er ein gut som skal ha heile livet framføre seg, men i staden opplever å ha det særs vanskeleg, seier Åmlid.

Måtte på sjukehus

Dei to mennene som sist veke var i retten, skal ved fleire høve ha hatt seksuell omgang med guten.

Mellom anna er mannen i 40-åra tiltalt for å ha hatt seksuell omgang med guten i ein bil på ein parkeringsplass.

Begge var tiltalte for å ha utført seksuelle overgrep mot guten heime i leilegheita til mannen i 60-åra.

– To gonger var det også ein anna mann til stades. Eg skulle tydelegvis vera lokkemat, sa den fornærma guten i dommaravhøyr som vart spelt av i retten.

Han forklarte seg om smerte under overgrepa, om flasker med sprit, sigarettar og kontantar, som påskjøning.

Ved eit høve vart guten filma.

Filmen vart delt med andre menn av den tiltalte i 60-åra.

Fleire gonger drakk guten så mykje at han vart alkoholforgifta, og måtte på sjukehus.

Den eldste tiltalte forklarte i retten at han heller ville gje guten sprit, enn at han skulle gå gatelangs og få tak i narkotika.

– Så du er liksom ein frelsar, kommenterte guten sin bistandsadvokat, Sigurd Klomsæt.

Bistandsadvokat meiner overgrepa er grovare

Den andre tiltalte fekk spørsmål frå Klomsæt om ikkje sprit og pengar i byte mot sex var prostitusjon.

– Nei, eg oppfatta det ikkje som prostitusjon, svarte han.

Alle overgrepa har sett sine tydelege spor hos fornærma.

– Han makta rett og slett ikkje å møta i retten. No får han hjelp, behandling og terapi, forklarer den erfarne advokaten.

Mora forklarte om ein gut som hadde vore på ein mørk plass i livet.

Klomsæt la ned påstand om oppreisingserstatning til guten i rettssaka.

– Han har det heilt jævlig, seier Klomsæt.

Advokaten har også varsla eit sivilrettsleg søksmål og meiner overgrepa er langt grovare enn det påtalemakta har tiltalt mennene for.

Klomsæt hevdar det er snakk om både valdtekt og organisert aktivitet, og at erstatningsbeløpet skal vera høgare.

Ber om fengsel

Advokat Odd Arild Helland, som representerte den yngste tiltalte i retten på Stord, er heilt usamd med Klomsæt.

– Eg anar ikkje kvar Klomsæt tek dette frå. Det kan i alle fall ikkje vera frå saksdokumenta, for det er ikkje grunnlag for å påstå noko sånt, seier Helland.

Advokaten meiner det er trist for dei fornærma i saka at Klomsæt kjem med slike skuldingar.

Klomsæt på si side kallar etterforskinga i saka for skandaløs, og meiner politiet ikkje har gjort nok for å etterforska om overgrepa var organiserte.

– Eg kan berre uttala meg om saka som går for retten i dag. Etterforskinga har vore god, og tiltalen reflekterer alvoret i saka, seier statsadvokat Åmlid.

Påstanden frå aktor var fengsel i eitt år for den eldste tiltalte, medan påstanden var åtte månader i fengsel for den yngste.

Dom i saka er venta i starten av mai.