Her køyrer den kinesiske turisten på venstre side av vegen

For kort tid sidan var ein kinesisk turist på køyretur på vinterføre litt utanfor Narvik.

Det sjåføren ikkje visste var at ein sivil UP-bil låg like bak.

Dei kunne observere at bilen fleire gonger køyrte over på venstre side. Motgåande trafikk måtte bråbremse for å unngå ein frontkollisjon.

Sjåføren blei stoppa og fråteke førarkortet av UP.

– Køyringa er definitivt av ein slik art vi ikkje ønsker på vegane.

Det seier distriktsleiar i UP, Geir Marthinsen.

– Det verkar som at vedkomande var veldig utrygg og ønska i større grad å ligge midt i vegen, og kanskje over i motsett køyrefelt, fordi han følte seg tryggare der.

Nordlys skreiv om køyringa først.

Fleire mistar lappen

Vedkomande bak rattet var ikkje ruspåverka eller sjuk. Han kom heller ikkje frå eit land med venstrekøyring, understrekar UP-sjefen.

– Får vi stadfesta at dei ikkje er påverka av rus, gir vi dei litt informasjon om korleis vi ønsker å ha det på norske vegar, for mange frå utlandet er ikkje vande med glatte vegar.

Kinesaren var på ferie og skulle berre oppleve vinteren i Noreg – og kanskje litt nordlys.

– Vi skal gle oss over at vi har turistar. Det er ei god næring som vi er avhengige av her i nord. Men det er klart at når vi får dei på vegane med slik åtferd så er det ein risiko for både meg og deg.

Han seier at når ein utanlandsk turist mistar førarkortet i Noreg, så gjeld det berre her. Turisten kan altså framleis køyre bil i heimlandet.

Politiet ser daglege eksempel på uønskt køyring på vegane. Og i 2024 var det cirka 25 prosent auke i talet sjåførar som blei fråteke førarkortet i Nordland, Troms og Finnmark.

Dei fleste av desse er knytt til for høg fart. Sist sommar var ein tredjedel av dei bøtelagde utanlandske turistar.

– Vi snakkar ofte om dei som køyrer for fort, men vi må ikkje gløyme at absolutt dei aller fleste som ferdast på vegane gjer det med fornuft.

Ser større utfordringar

– Køyringa i denne videoen er heilt klart farleg. Sjåføren vel å ligge midt i vegen, og til dels i køyrebane, noko som openbert ikkje skal skje.

Det seier Kari Vassbotn i Trygg Trafikk.

– Det skapar farlege situasjonar. Det er i tillegg vinterføre, som gjer dette endå farlegare.

Dei ser større utfordringar med turistar på vinterføre i dei seinare åra. Det er ein naturleg følge av at ein har fått fleire turistar i vintermånadane, seier Vassbotn.

Ho seier vidare at Trygg Trafikk, i samarbeid med fylkeskommunen, NHO reiseliv og Nordnorsk reiseliv, jobbar med ulike tiltak for å møte denne problemstillinga.

Ho nemner at fleire ting som må gjerast:

• Vere ærleg og tydeleg i marknadsføringa av Nordland om vinteren.

– Det er krevjande å køyre på vinterføre, og det må våre gjestar informerast godt om, før dei kjem til fylket vårt.

• Sjå om turistar kan få alternative transportmåtar

– Vi må sjå om det er mogleg å tilby turistar som ikkje er vande med vinterføre alternative transportmåtar. Kanskje er det marknad for å leige bil eller minibuss med lokal sjåfør?

• Vi må nå turistar med informasjon tidleg

– Vi må nå turistane med god informasjon i planleggingsfasen. Dei må vite kva dei kjem til, og vite om alternativet for å køyre sjølv.

– For dei som vel å køyre sjølv, må vi sørge for at dei i det minste har grunnleggande kunnskap om korleis ein køyrer på vinterføre, for ikkje å skape farlege situasjonar for seg sjølv og andre.