Hamas frigir den israelsk-amerikanske soldaten Edan Alexander

Frå palestinarane blir det rapportert om ei pause i krigføringa, skriv al-Jazeera.

Denne pausen er berre mellombels, til Alexander er ute av Gaza, har Israels statsminister Benjamin Netanyahu understreka.

Alexander blir frakta av ei spesialeining til eit mottak i Re'im, ein kibbutz nær Gazastripa.

Det har vore ulike meldingar om når Eden Alexander skal bli lauslaten. Tidlegare blei det meldt at det skulle skje klokka 16.00. Men ifølge Trump vil lauslatinga skje klokka 18.00 norsk tid.

Kidnappa 7. oktober

Edan Alexander er truleg den siste overlevande med amerikansk statsborgarskap som har blitt halden fanga av Hamas på Gazastripa.

Han blei tatt som fange under terrorangrepet 7. oktober 2023, då han var stasjonert nær grensa til Gaza og blei kidnappa frå basen.

Alexander er fødd i Tel Aviv, men vaks opp i USA. I 2022 flytta han til Israel for å verve seg til det israelske forsvaret.

Lauslatinga av Edan Alexander er den første sida Israel utvida bakkeinvasjonen i Gaza i mars.

Gest til USA

Det var søndag kveld at Hamas fortalde at dei ville sleppe fri Alexander, og at dei har vore i direkte samtalar med USA over helga.

Saman med Qatar og Egypt har dei diskutert ei våpenkvile i forkant av president Donald Trumps besøk til Midtausten denne veka.

Khalil al-Hayya frå Hamas seier at lauslatinga av Alexander er ein gest til amerikanarane. Soldaten er truleg det siste levande gisselen med amerikansk statsborgarskap.

Same kveld roste Trump avgjerda, og skreiv at han «gledde seg over å kunngjere at Alexander får kome heim til familien sin».

Måndag takkar Israels statsminister Benjamin Netanyahu, Trump for hjelpa med lauslatinga.

Ifølge Al-Hayya er lauslatinga av Alexander er eit ledd i forsøket på å få til ei våpenkvile og få oppheva den israelske blokaden av naudhjelpsforsyningar til Gaza.

Blokaden har vart i 71 dagar, og har forsterka den humanitære krisa inne på Gazastripa.

Kjelder til Wall Street Journal og CNN skriv at ein israelsk delegasjon skal reise til Kairo for å ta opp att forhandlingane med Hamas.

Avkreftar våpenkvile

Måndag morgon sa Hamas til den saudiske nyheitskanalen Asharq at ei mellombels våpenkvile for å legge til rette for lauslatinga av Alexander hadde begynt. Dei seier det inneber stans i all militær aktivitet i lufta og på bakken.

Tidlegare på morgonen gjekk statsminister Benjamin Netanyahu ut og avviste at Israel hadde gått med på ei våpenkvile i byte mot lauslatinga.

– Vi har berre forplikta oss til ein trygg korridor for å få Edan Alexander ut av Gaza, står det i ei utsegn frå Netanyahus kontor.

Han understrekar at dette ikkje setter noko stoppar for Israels planar om å intensivere krigføringa.

Natt til måndag heldt den israelske hæren fram med angrepa mot Gazastripa, mellom anna mot ein skule i byen Jabalia.