Fylkestopp i hardt vêr – igjen

– Det skulle aldri ha skjedd, seier fylkestingsrepresentant, Bjørnar Tollan Jordet (SV).

Denne hausten har Innlandet fylkeskommune vore prega av ei svært betent sak.

Kort fortalt handlar det om at fylkeskommunedirektør Trond Bamrud vart varsla på etter at han gav lønslån på nær 150.000 kroner til fylkesordførar Thomas Breen (Ap).

Dette vart gjeve utan politisk behandling, og utan at Bamrud hadde fullmakt til å gjere dette, ifølgje ein ekstern varslingsrapport frå EY.

• Dette er ikkje det første varselet mot fylkesdirektøren. Også under skulenedleggingane i Innlandet i fjor vart det varsla mot han.

Handlar ikkje om korrupsjon

Basert på rapporten frå EY og eit notat frå KS-advokat Tor Allstrin, meiner arbeidsgjevarutvalet i fylket, at det Bamrud gjorde ikkje var korrupsjon.

Likevel stadfestar dei at fylkesdirektøren ikkje hadde fullmakt til å gjennomføre utbetalingane.

• Les også om at fylkesdirektøren i Innlandet blant dei som tener mest i fylkeskommunane i Noreg.

Utvalet meiner at det ikkje er grunnlag for å gi sanksjonar mot fylkesdirektøren.

Den konklusjonen reagerer SV kraftig på.

– Dette er skivebom frå både EY og arbeidsgjevarutvalet. Denne saka har aldri handla om korrupsjon, men om tilliten til fylkeskommunen, seier Tollan Jordet.

– Vi meiner fylkesdirektøren har brote forskrifta for godtgjering av folkevalde. Det skulle aldri ha skjedd, og direktøren har ikkje fullmakt til å fatte slike vedtak.

Hanne Velure, fylkesvaraordførar (H) og leiar i arbeidsgjevarutvalet i Innlandet fylkeskommune, reagerer på at fleire i opposisjonen no tek saka opp i media.

Stiller seg ikkje bak utvalet

Neste veke skal varslingssaka bli behandla bak lukka dører i fylkestinget.

Tollan Jordet varslar at SV ikkje vil støtte arbeidsgjevarutvalet sitt forslag til innstilling.

– Saka handlar utelukkande om fylkestinget kan ha tillit til om fylkesdirektøren forvaltar den fullmakta han er gitt på ein forsvarleg måte, seier Tollan Jordet.

– Arbeidsgjevarutvalet har feil fokus i si innstilling, og SV vil ikkje støtte innstillinga 2. desember.

Han meiner fylkesdirektøren har brote forskrifta for godtgjering av folkevalde.

– SV meiner dette er eit grovt tillitsbrot, og at fylkestinget må vurdere om vi framleis har tillit til at Bamrud er i stand til å forvalte vedtaka våre på ein måte som gagnar fylkeskommunen.

– No har vi hatt nok av dette

Fylkestingsrepresentant Svein Ørsnes (R) er einig i nokre av utspela til Tollan Jordet.

– Eg er litt usikker på om fylkesdirektøren kan gjenopprette den tilliten som ein må ha i offentleg forvaltning, seier Ørsnes.

– Eg synest nok at Bamrud bør få ein reaksjon frå fylkestinget som gjer at han ikkje startar på scratch om det kjem ei varslingssak til. Det bør kome ei tilbakemelding frå fylkestinget som seier at no har vi hatt nok av dette.

Han seier at heller ikkje Raudt vil stille seg bak arbeidsgjevarutvalet sitt forslag til innstilling.

Det same varslar Senterpartiet.

• Her kan du lese alt om varselet mot fylkesdirektøren i Innlandet.

Må tydeleggjerast

– Eg synest arbeidsgjevarutvalet har kome med eit godt utgangspunkt til vedtak, men vi har varsla at vi vil spisse det litt. Det må vere tydeleg at det er forskrift for godtgjersle som gjeld folkevalde. Dette må vi drøfte i fylkestinget.

Det seier gruppeleiar i Senterpartiet, Aud Hove.

Ho er einig med Tollan Jordet om at varselet mot fylkesdirektøren ikkje først og fremst handlar om korrupsjon.

Samstundes er ho ueinig i at rapporten frå EY og konklusjonen til arbeidsgjevarutvalet er skivebom.

– Eg synest EY har gjort ei god kartlegging. Dei fekk eit mandat, og har svart ut det dei vart bedne om.

Ho vil ikkje bruke dei same orda, «grovt tillitsbrot», som Tollan Jordet nyttar.

– Varselet handlar om at fylkesdirektøren har gått utover sine fullmakter. Det er heilt klart, og EY er jo også av den meining, samstundes som dei meiner regelverket ikkje er tydeleg nok. Så får vi finne ut kva slags ord vi skal bruke på det, seier Hove.

• Det har storma rundt Innlandet fylkeskommune det siste året. Særleg etter at dei vedtok å legge ned seks vidaregåande skular og skulestader.

Vil ikkje kommentere saka

Kritikken mot arbeidsgjevarutvalet har blitt lagt fram for Velure som leiar utvalet.

– Arbeidsgjevarutvalet har gitt frå seg si innstilling basert på varslingsrapport og arbeidsrettslege tilrådingar frå svært kompetente juridiske fagmiljø, skriv ho i ein e-post til NRK.

• Les også om at fylkesvaraordføraren visste om varselet mot fylkesdirektøren utan å informere fylkesutvalet.

Varslingssaka skal sluttbehandlast i fylkestinget tysdag 2. desember. Sidan møtet går bak lukka dører, vil ho vil ikkje drøfte saka i media no.

– Fylkestingsrepresentantane er alle arbeidsgjevarar, og det overraskar meg difor at Tollan Jordet vel å prosedere saka i media, seier ho.

Fylkesdirektør Tron Bamrud vil ikkje kommentere saka eller påstandane mot han sidan saka skal opp til politisk behandling neste veke.

Her kan du lese fleire reaksjonar frå fylkespolitikarar på varslingssaka:

Belastning for tilliten

Statsvitar Tord Willumsen ved Universitetet i Innlandet trur saka kan vere belastande for tilliten til fylkeskommunen, både som organisasjon, men også dei folkevalde.

– Det at saka rullar og går i seg sjølv er alltid belastande for tilliten.

Han forklarar at det handlar om at alle ikkje får med seg alt, men dei fleste får med seg at det har vore noko bråk og uro.

– Det er alltid uheldig. Samstundes er det mykje betre at ting kjem opp og blir undersøkt.

– Dei mest alvorlege skuldingane kan bli avviste etter ei grundig undersøking. Det er tillitvekkande.

Basert på denne varslingssaka, trur han det ikkje vil vere aktuelt for fylkestinget å be Bamrud om å gå.

– På bakgrunn av denne rapporten og konklusjonen i han, så ser eg ikkje at denne saka er av ei slik alvorsgrad at han burde gå.

– Han er i såpass stor grad frifunnen, det einaste han er funnen skuldig i, er at det var så mykje tvil at han burde gått tilbake til fylkestinget og bedt om klarare fullmakt. Det er det einaste, seier Willumsen.