Frp varslar titals milliardar i skatte- og avgiftskutt

Skrote formuesskatten, kraftige kutt i inntektsskatten og bil- og drivstoffavgiftene, og fjerning av momsen på vatn, avløp og renovasjon.

Det er blant punkta på ønskjelista i Framstegspartiet (Frp) sitt programutkast.

– Det er spesielt viktig å redusere inntektsskatten, for å motivere fleire til å gå over i arbeid og få eiga inntekt, seier Hans Andreas Limi, finanspolitisk talsperson i partiet.

– Meir å rutte med

Ifølgje han hadde Frp levert skattekutt på 5200 kroner til folk med inntekter mellom 600–800.000 kroner i år, dersom dei sat med makta aleine.

– I tillegg ville vi redusert mykje på avgiftene. Så ein vanleg familie ville få rundt 2000 kroner meir i månaden å rutte med. Betydeleg meir enn det Vedum har levert, som neste år gir ei krone per dag, seier Limi, som skulda finansministeren for å skattebløffe, då han la fram forslag til statsbudsjett.

I fjor fekk staten inn like i overkant av 30 milliardar kroner i formuesskatt. Frp vil skrote heile.

– Det er viktig at vi har eit skattenivå som gjer at norske bedrifter overlever og blir i Noreg. Vi er nøydde til å ta debatten og skape gode utviklingsmoglegheiter for norske bedrifter og norske gründerar. Altfor mange flyttar no ut, seier Limi.

Kutt i bistand og klima

Prislappen på å skrote formuesskatten og momsen på vatn, avløp og renovasjon aleine er på kring 37 milliardar kroner.

– De snakkar om kutt for mange titals milliardar kroner. Kor skal dokke hente alle desse pengane frå?

– Vi vil redusere norsk bistand, vi vil kutte i symbolske klimatiltak som har liten eller ingen effekt på klimaet. Vi vil fjerne fylkeskommunen og legge ned dei regionale helseføretaka. Vi må rett og slett organisere oss på ein mykje meir effektiv og billegare måte, seier Limi.

– Kor skal du gå i Stortinget for å få fleirtal for dette?

– Det blir spennande å sjå etter valet neste år. Det er nok ei rørsle i enkelte parti, fordi skatt har blitt eit viktig tema på grunn av dei store skatteauken som den sittande regjeringa har gjennomført, seier Limi.

NRK har spurt dei tre partia (Høgre, Venstre og KrF) som har sete i regjering med Frp tidlegare:

• Ingen vil fjerne heile formuesskatten, berre den som er på arbeidande kapital
• Alle er svært skeptiske til kutt i bistanden og kutt i klimatiltak

– Kva vil de gjere med lakseskatten?

– Vi meiner den bør endrast, fordi utforminga er veldig uheldig. Vi meiner skatten skal baserast på reelle inntekter og utgifter.

– Kvifor går ikkje Frp til val på å skrote den?

– Vi røysta mot den i Stortinget. Men no er den innført. Då meiner vi at det er fornuftig å lytte til næringa, og gjere dei tilpassingane som er naudsynte for å få det til å fungere, seier Limi.

– Regjeringa har innført ein exitskatt. Kva gjer de med den?

– Dei har endra innretninga på den, så det står att å sjå korleis den kjem ut i Stortinget. I utgangspunktet er vi i mot den.