Frisørar møkk lei midtskil-trenden: – Ikkje alle som kler det

22 år gamle Emil Andre Johansen Bysheim sit i stolen hos frisørsalongen Think Hair Wear på kjøpesenteret Galleriet i Bergen.

Han har planen klar.

– Det blir midtskil då. Sjølvsagt.

– Vil heller bli skalla

Bysheim går på vidaregåande og skal snart ut i lære.

Det er difor på tide med ei oppfrisking.

– Midtskil er fantastisk. Det er lett å stella, og kvar morgon legg det seg akkurat slik eg vil ha det, fortel han.

Midtskil har han berre hatt i eitt år. Likevel nektar han å gå tilbake til sideskil.

– Eg vil heller bli skalla!

Hårtrenden har eksplodert

Den populære hårtrenden kom tilbake for alvor for nokre år sidan og har eksplodert.

Bysheim har fleire teoriar på kvifor nesten alle unge menn i dag køyrer midtskil.

– Det er ein studentvenleg sveis, fordi ein slepp å klippa seg ofte. Også er den jo fin då.

22-åringen likar å leggja håret over vikene sine, slik at dei ikkje syner.

– Det er nok mange som køyrer same taktikken som meg, ler han.

Frisørane er leie

– Me er kome til det punktet at me kunne klipt denne sveisen i blinde.

Det seier Kirsti Hammer (51) og Regine Henneli (46), som driv frisørsalongen K & R Frisører på Strandkaien i Bergen.

Dei har sett seg leie på den populære hårtrenden som har dominert blant unge menn dei siste åra.

– Identiteten forsvinn når alle skal ha same hårsveis, seier Henneli.

– Men me tek jo klippen. Sjølv om me tykkjer dei alle ser like ut når dei går ut herifrå, ler Hammer.

– Det er frustrerande å sjå, når så mange eigentleg kler noko anna. Eg prøver gjerne å seia at dei er fine med sideskil, men det er «no way».

Sosiale medium spelar største rolla

Karen Bessesen er hårekspert og instruktør ved Norsk Frisørskole i Bergen.

Ho trur koronapandemien i åra 2020–2022 har hatt mykje å seia for midtskil-trenden.

– Folk fekk lov til å gro ut håret og fekk kjenna på korleis det var. Det vart ein suksess for mange.

Denne virale tiktok-lyden, laget av TikToker Andre Ward, tok heilt av i 2022:

Håreksperten meiner likevel at det er sosiale medium som har spelt den aller største rolla.

– No er det influensarane som folk ser opp til.

– Frisørane kan ta seg ein bolle

Realitydeltakar Martin Garnås Sire, kjend frå «Love Island», er blant kjendisane som køyrer midtskil.

– Alle frisørane som er leie av å klippa midtskil kan ta seg ein bolle, seier han spøkefullt.

Sire seier likevel at det ikkje hadde vore dumt med ein ny trend.

– Så slepp alle å ha same sveisen som meg.

No delar han frisyre med blant andre KRF-leiar Dag Inge Ulstein og ei rekkje andre kjendisar i inn- og utland.

Også på gata i Bergen er det lett å sjå at det er midtskil som gjeld:

– Midtskil fordi alle andre har det

– Eg har eit inntrykk av at dei fleste kundar ber om midtskil fordi alle andre har det, ikkje fordi dei sjølv ønskjer det, seier Linea Lorenze Brendø Gjørøy (19) er frisørlærling ved Think Hair Wear på Galleriet i Bergen.

– Dei som passar midtskil best, er menn med avlange fjes. Dersom ein har eit rundt fjes, passar sideskil best.

– Har du hatt kundar som har angra på midtskil?

– Absolutt. Det er alltid nokon som angrar. Då får eg litt lyst til å seia «I told you so», ler ho.

Trur trenden kjem til å vara

– Kva seier denne trenden om samfunnet i dag?

– Me går litt tilbake til «det enkle». Folk går mindre til frisøren no enn før, fortel hårekspert Karen Bessesen.

Både Emil Andre Johansen Bysheim, hårekspert og frisørane trur midtskil-trenden kjem til å vara ei god stund til.

– No byrjar det også å vera trendy med hockeysveis, eller «mullet» som dei kallar det. Trendane går i ein evig sirkel, understrekar frisør Kirsti Hammer.