Først fekk han juling – så blei han pågripen for utpressing

Natt til søndag 23. juni blei ein 24 år gamal mann i Bergen utsett for vald av fleire personar. 

Det skjedde midt på Torgallmenningen, skriv Bergens Tidende.

Videoen, som avisa har fått tilgang til, viser at fleire slår, sparkar og dyttar til 24-åringen. På eit tidspunkt ligg han på bakken og prøver å dekke seg til. 

24-åringen politimelde valden på staden, same natt. Men i løpet av ei veke utvikla saka seg brått. 

Meir om det litt seinare.

– Oppstod konflikt

Førebels har politiet klart å identifisere tre menn rundt 20-årsalderen, som alle er mistenkt for kroppskrenking mot 24-åringen.

– Det er uklart kva som fører til konfrontasjonen. Det oppstår ei konflikt, så skjer det som videoen viser delar av, seier politiadvokat Per Øyvind Valland til TV 2.

Mannen som får juling, er tidlegare omtala av TV 2 i fleire saker. 24-åringen er nemleg sikta i minst seks ulike bedragerisaker. 

I mai vart han politimeld for å ha svindla til seg ein bil utan å betale for seg. 

Nyleg blei han frikjent i gruppevaldtektssaka i Bergen, men likevel dømd til å betale erstatning.

– Det er ingenting i valdssaka som førebels tyder på at det er ein samanheng med andre saker offeret er involvert i. Det verkar førebels som eit meir eller mindre tilfeldig treff, seier Valland.

Dei tre som er mistenkt for valden kjenner kvarandre og er heller ikkje «heilt ukjente» for politiet frå før. Derimot seier dei til politiet at dei ikkje kjenner 24-åringen frå før.

Skal ha starta utpressing

Så, i dagane etter valdsepisoden, har saka utvikla seg. Dei tre valdsmistenkte mennene politimelde 24-åringen for utpressing og trugslar.

30. juni vart 24-åringen pågripen av politiet, avhøyrt og sett i arrest. Der overnatta han, medan politiet mellom anna ransaka bustaden hans.

– Dei tre hevdar seg utpressa av 24-åringen til å hente ut verdiar og overlate verdigjenstandar til den fornærma i valdssaka. Det er snakk om verdigjenstandar til fleire titals tusen kroner, seier Valland.

ETTERFORSKAR: Per Øyvind Valland er politiadvokat i Vest politidistrikt og har fleire saker på bordet som gjeld 24-åringen. Foto: Tor Henning Flaatten / TV 2

Overleveringa av verdigjenstandane skal ha skjedd 24.- og 25. juni.

Vil ikkje kommentera

Valland vil ikkje seie kva gjenstandar det er snakk om, eller om politiet har tatt beslag i nokre av desse. 

– Er dette gjenstandar dei har måtta få tak i eller stele, eller hadde dei gjenstandane sjølve?

– Omstenda rundt gjenstandane vil me ikkje gå ut med enno. Etterforskinga tyder førebels på at valdsepisoden blir brukt for å utpresse dei tre. Det er ein klar samanheng, seier Valland.

TV 2 har stilt fleire spørsmål til 24-åringen sin forsvarar. 

– Eg har for tida ingen kommentar til verken valdsepisoden min klient er utsett for i Bergen sentrum eller andre saker han skal vere part i, skriv advokat Torbjørn Sognefest i ein tekstmelding.

Ingen av dei tre mennene som er mistenkt for valden mot 24-åringen har fått oppnemnd forsvararar. Politiet vil heller ikkje seie kva dei har forklart.