Etter skulenedlegging: Pløyer millionar inn i privat vgs

4 hours ago 5

Vgs. i Lom var éin av seks skular og skulestader i Innlandet som vart vedtekne nedlagt sist haust. No spyttar lokale krefter inn millionar så Anna (17) kan halde fram på eit privat skuletilbod i bygda.

Frank Ertesvåg

Torsdag 13. februar kl. 19:04

Lom og Skjåk kommunar har slått ring rundt den kombinerte skule- og kulturbygningen Utgard i Lom.

Anna Bøje Kvandalsvoll (17) frå Lom går vg2 studiespesialisering på ein vidaregåande skule som berre har fire månader att å leve.

Men etter sommarferien kan ho etter alt å dømme halde fram i same skulelokale - men då på Jotunheimen privatistskule.

– No har eg verkeleg tru på at eg kan få lov til å fullføre videregåande her i Lom. Eg budde på Hamar då eg gjekk første året. Men skulemiljøet vart for stort for meg. Eg passa ikkje inn der. Difor er det spesielt for meg å få fullføre vidaregåande i heimbygda mi, her i Lom. Det er så trygt her, og eit godt miljø, skryt Anna.

Arild Garcia de Presno

Daglig leiar i Interfil, Skjåk

Ein av dei som no syter for at den tidlegare offentlege vidaregåande-avdelinga blir omskapt til en privat vgs, er Arild Garcia de Presno i Skjåk.

Han leiar Interfil, ein av Nord-Gudbrandsdal sine største verksemder.

Produsenten av filter til ventilasjon, går inn med 4,5 millionar kroner i den nye privatskulen i dei nærmaste åra.

– Vi ser på dette som ei investering inn i framtida og i ungdommen. Interfil i seg sjølv har sikkert ikkje bruk for dette i dag og i morgon. Men vi jobbar voldsomt mot nedgang i folketalet. Det å ta vare på den skulen vil være en fellesnemnar
for både arbeidskraft, folkesetnad og kompetansemiljøet her, seier de Presno til VG.

Ei av drivkreftene for den private, vidaregåande skulen i Lom, Hanna Skjåkødegård, tykkjer det er strålande at de Presno og Interfil stiller opp med pengar til skulen i den vesle fjellbygda.

Ho var ein av svært mange skuffa og forbanna lokale sjeler då fylkestinget vedtok nedlegging av skulen i oktober. No er tonen ein annan.

– de Presno og Interfil går føre og viser kva skulen i Lom betyr for næringslivet vårt. Samstundes har Lom og Skjåk kommune garantert for ein tredjedel av kostnadene, i praksis kanskje 20 millionar dersom vi kjem i mål med 60 millionar totalt, seier Skjåkødegård til VG.

I første omgang startar ein no skule hausten 2025 etter ein privatist-modell - med undervisning av elevane veldig retta mot eksamen.

Så er planen å gå vidare med ein meir tradisjonell vidaregåande privatskule på eit kristent verdigrunnlag frå hausten 2026 etter at Utdanningsdirektoratet har vurdert søknaden.

For eleven Anna Bøje Kvandalsvoll passar det fint, seier ho. 80 ungdommar har hittil søkt seg inn på det nye skuletilbodet. Det gjeld til dømes alle i Anna sin vg2-klasse.

– Det kjem til å bli eit skuletilbod med tilpassa undervisning innretta mot eksamen - med gode lærarar som har røynsle frå vidaregåande, seier 17-åringen til VG.

Ho tykkjer det er «fantastisk» å sjå at lokalsamfunnet tek ansvar og etablererer eit privat, vidaregåande skuletilbod «oppi fjellbygda her».

– Kvifor er det så viktig å halde fram med skule i Lom, og ikkje reise til Otta?

– Denne skulen her har eit heilt utruleg bra miljø. Dei er gode på fagleg læring, men gir oss også ein tryggleik og ei kjensle av å høyre til i lokalsamfunnet. Så slepp vi lang reiseveg og skuleskyss, svarar Anna.

Også på Flisa, ei anna nedleggingsråka bygd i Innlandet, jobbar sterke krefter for å lage privat vgs.

Næringslivet gjekk saman om å lage eit tilbod for 66 elevar. Men vurdering av søknader om privatskular i Utdanningsdirektoratet tek tid. Lengre tid enn det lokalentusiast og artist, Matoma, hadde sett føre seg.

Her kan du lese meir om skulenedlegging i Innlandet

Tom Stræte Lagergren, som han eigentleg heiter, nektar likevel å gi opp.

– At næringslivet gjekk saman om ein slik skule, er eit symbol på håp og framtidstru. Eit klart signal om at vi nektar å gi opp. Men byråkratiet sa nei, fastslår Lagergren i ein kronikk han har sendt til VG.

Utdanningsdirektoratet begrunnar avslaget med at søknaden om oppstart for skuleåret 2025/26 skulle ha vore inne før 1. februar 2024.

– Altså før fylkestinget vedtok nedlegging av fleire skular i Innlandet. Ungdom på Flisa må altså vente til hausten 2026 på eit lokalt skoletilbod – ein evigheit for unge menneske.

– Politikarar kan altså legge ned ein skule over natta, men det tek minst 18 månader å få starta ein ny. Ein rekk nesten å setje to barn til verda innan den tid, skriv Matoma.

Read Entire Article