Ein time fysisk aktivitet om dagen: – Det går an å gjere ganske billeg

9-åringen susar ned brannstonga på ein klatreleikeplass i Oslo sentrum. Mia elskar å suse rundt på leikestativet. NRK møter ho dagen før skulestart.

– Når du har time på skulen må du vel sitte roleg ved pulten. Kva synest du om det?

– Dumt. For eg har veldig ofte veldig mykje energi, seier Mia.

– Kva får du lyst å gjere då?

– Eg får veldig lyst til å springe rundt og leike ute på leikeplassen.

Fleirtalet ønska ein time dagleg fysisk aktivitet

Vandrehallen på Stortinget 4. desember 2017: Opposisjonen har sikra fleirtal for å sikre ein time dagleg fysisk aktivitet til alle born i grunnskulen.

Helse- og omsorgskomiteen får blomar for å feire sigeren. Olaug Bollestad (KrF) og Kjersti Toppe (Sp) får til og med prinsessekroner. Dåverande idrettspresident Tom Tvedt har møtt opp og gir Bollestad ein stor klem.

Vedtaket lyder: «Stortinget ber regjeringa innføre ei ordning som sikrar elevar på 1.–10. trinn minst ein time fysisk aktivitet kvar dag innafor dagens timetal, og at det finansierast som eit folkehelsetiltak.»

I innstillinga vart det altså spesifisert at det ikkje trong å vere ein ny gymtime, men kunne løysast innafor dagens timetal.

– Går an å gjere ganske billeg

Elin Kolle er prorektor og forskar ved Noregs idrettshøgskole. I 2017 fekk ho i oppdrag frå regjeringa å sjå på korleis fysisk aktivitet påverkar elvane - ho såg på ungdomstrinnet.

– Dei fekk auka fysisk aktivitetsnivå, betra kondisjon og i tillegg gjorde dei det betre på nasjonale prøver i lesing og i rekning, seier Kolle.

Vi spør forskaren korleis ein kan bruke fysisk aktivitet som del av andre fag.

– I staden for å sitte i eit klasserom og passivt lære matte kan du til dømes lære ved å gå ut i skolegarden og ha ein mattestafett.

– Kan du nytte fysisk aktivitet i fleire fag?

– Du kan nyttiggjere det i alle fag. Ofte nyttast det som repetisjon for å lære inn stoff som du allereie har lært teoretisk i klasserommet.

Ho seier det ikkje er mykje som må til for å få til auka fysisk aktivitet innafor dagens timetal.

– Du må ha lærarar som har kompetanse på korleis dette gjerast og i tillegg har vi sett at det er viktig at det er timeplansfesta. Utover det trengst ikkje så mange ressursar. Det går an å gjere dette ganske billeg,

– Ganske billeg? Men kvifor er det ikkje gjort allereie, då?

– Ja, det må du nesten spørje dei som har ansvar om.

– Kjem i ungdomsmeldinga

I dag er det Arbeidarpartiet og Senterpartiet som sit i regjering og har ansvaret. Vi spør Kunnskapsministeren kvifor dei ikkje har følgt opp ein time dagleg fysisk aktivitet som dei sjølve stemte fram i 2017.

– Først vil eg berre understreke kor viktig det er med fysisk aktivitet i skulen. Det er viktig for hukommelsen, det er viktig for problemløysing og for konsentrasjonen. Det eg også kan seie er at den førre regjeringa valde å oppheva det vedtaket som vart gjort for sju år sia. Derfor har vi i Hurdalsplattforma vore klåre på at vi gradvis vil innføre dagleg fysisk aktivitet i skulen, seier kunnskapsminister Kari Nessa Nordtun.

– Men Ap var jo ein del av fleirtalet på Stortinget i 2017 som ønskte ein times dagleg fysisk aktivitet i grunnskulen. Kvifor har dåkke ikkje valt å innføre dette?

– Dette vil adresserast i Ungdomsmeldinga vår som skal leggjast fram om kort tid. Der følger vi opp det som står i Hurdalsplattforma: «Regjeringa vil gradvis innføre dagleg fysisk aktivitet i skulen, med fridom for skulane til å organisere dette sjølve».

– Forskaren ved idrettshøgskolen meiner formuleringa dykkar er for vag, og meiner det må stillast krav til fysisk aktivitet om det skal bli røyndom. Kva seier du til det?

– Eg skulle ønske vi kunne innført eit krav i morgon, men eg må vedkjenne at vi verken har den kompetansen eller forankringa ute i skule-Noreg til å innføre dette innan så kort tid. Derfor er det viktig at vi gjer dette gradvis med fridom til skulane til å organisere dette sjølve, avsluttar kunnskapsministeren.