Dømt til fengsel etter at Bita Azizi (22) døydde i ulykke

Ho mistar og førarkortet i fire år, og må betale 390.000 kroner i oppreisingserstatning.

Det var fire personar i bilen da ulykka skjedde. Tre av dei var fysisk uskadd, men Azizi omkom på staden.

Kvinna er dømt for å aktlaust ha valda ein annans død, og for brot på vegtrafikkloven. Ho har tidlegare erkjent straffskyld, og sa i rettssaka at ho ynskjer å ta ansvar for det som har skjedd.

I retten beskreiv sjåføren Azizi som si beste venninne.

Kvinna forklarte seg frå eit anna rom, som vart videooverført til rettssalen. Ho var tydeleg prega under forklaringa, fortel NRKs reporter som var til stades.

– Ho har det veldig, veldig tøft no. Det er tungt for ho å stå i dette, og å møte dei etterlatne og familien. Ho sit med ei stor kjensle av skuld.

Det sa kvinnas forsvarar, Sidra Bhatti, til NRK da rettssaka gjekk.

Bhatti seier kvinna har tatt områdingstid i forhold til om ho skal anke dommen.

Hang ut av vindauget

Natt til søndag 11. august 2024 vart sjåføren, kvinna på 25 år, ringt og spurt om ho kunne hente nokre venninner etter dei hadde vore på byen i Oslo.

Klokka 04.50 var dei tilbake i Heggedal i Asker, ifølgje tiltalen.

Ifølgje dommen kan det ikkje bevisast at ho køyrde raskare enn fartsgrensa mens ho filma, og politiet seier ho heller ikkje var ruspåverka.

Men passasjerane hang ut av vindauga på bilen, utan bilbelte, og sjåføren filma med mobilen.

«Fem av videoane vart tatt i løpet av ein periode på to minutt og over ein køyreavstand på 1,5 kilometer. I løpet av denne perioden hang alle dei tre jentene ut av bilvindauga, samtidig som sjåføren filma. Ingen av jentene brukte bilbelte. Dei sat i vindaugskarmen og hadde heile overkroppen utanfor bilen, mens beina var inni bilen. Dei fryda seg, skreik og strakte armane i vêret.», står det i dommen.

Men mobilbruken gjorde at sjåføren ikkje følgde tilstrekkeleg med på vegen, meiner politiet.

I ein nedoverbakke med ein svak sving, svinga ho ikkje i tide.

Det gjorde at ho vart drege ut av vindauget og slengt tilbake mot bilen før ho trefte bakken.

Skadane var så store at ho døydde på staden.

– Det har vore veldig uheldig. Dessverre gjekk det eit liv tapt, seier Bhatti.

Strafferamme på inntil seks år

Da rettssaka gjekk i førre veke bad aktor om åtte månader vilkårslaus fengsel, skriv Budstikka.

Strafferamma for aktlaust drap er inntil seks års fengsel.

Politiet la særleg vekt på mobilbruken til sjåføren, og la den til grunn for at dei tok ut ein strengare tiltale.

Dei meiner den er årsaka til ulykka.

– Her ser vi at det er bruk av mobiltelefon, samtidig som tre passasjerar sit med overkroppen ut av vindauget. Det meiner vi er eit markert avvik frå normal framferd i trafikken, seier aktor Lene Risten.

Sidra Bhatti, forsvararen, sa at dei òg ville sjå på korleis passasjerane sjølv har medverka til ulykka før prosedyrane.

– I utfallet av saka håper eg ein ser på dei samverkande årsakene til ulykka. Og at ein ser an korleis tiltalte har det i dag og korleis livet til hennar er, og at ein tar omsyn til det ved utmålinga av straffa.

I dommen står det at dødsulykka kunne vore unngått dersom Azizi hadde sete inne i bilen.

– Det er likevel sjåførens grovt uaktsomme køyring som er den dominerande årsaka til dødsulykka, og det vil stride mot den alminnelege rettsoppfatning dersom det ikkje blir reagert med straff, ifølge dommen.

– Eit sår som vil vare livet ut

Familien til Azizi var tydeleg prega under rettssaka. Deira bistandsadvokat, Seiran Said Ahmadi, sa til NRK at dei såg fram til å få ei avslutning.

– Dei har sett fram til å sitte her og høyre hennar forklaring. Ho var til stades, og det at dei sit å høyrer ho fortelje, trur eg ikkje gjer sorga enklare, men dei får ei avslutning på prosessen.

– Dette er eit sår som vil vare livet for denne familien.