Betalte for overgrep med sprit og pengar

I april møtte to menn, ein i 40-åra og ein i 60-åra, i Haugaland og Sunnhordland tingrett.

Begge var tiltalt for grov seksuell omgang med barn mellom 14 og 16 år. Saman forgreip dei seg på ein då 14 år gamal gut. 

Det skjedde i den eldste tiltalte sin bustad.

I retten hevda begge to at guten hadde sagt han var 16 år gamal. 

Likevel skrytte mannen i 60-åra til andre om at han hadde hatt trekant med ein 14-åring. «Hadde 3 kant med han på 14 med fire forskjellige», skreiv han i ei tekstmelding til ein anna mann på Vestlandet.

– Dei visste kor gamal eg var, alle saman, sa den fornærma guten i tilrettelagde avhøyr med politiet.

Skrytte av trekant med 14-åring: «Han som løy på alderen»

Alkohol og pengar

No er begge mennene dømd for overgrepa mot guten. Retten har funne bevist at det både skjedde saman og kvar for seg.

Mannen i 40-åra er dømd til sju månadars fengsel. Han må også betale 60.000 kroner i erstatning til den fornærma guten.

Retten meiner det er skjerpande at mannen betalte for den seksuelle omgangen med både pengar og alkohol. I tillegg introduserte han 14-åringen for den andre tiltalte.

Mannen i 60-åra er dømd til fengsel i 11 månadar. Han må betale 80.000 kroner i erstatning. Han er også dømd for å ha filma og delt seksuelle videoar og bilete av fornærma. 

Retten finn det skjerpande at han har gitt fornærma totalt 5-6.000 kroner etter treffa.

Begge får kraftig strafferabatt på rundt 30 prosent for å ha tilstått overgrepa og erkjent straffskyld.

Sikta mann pågripen denne veka

Det er langt frå siste gang at nokon må i retten for å ha forgripe seg på same guten, som i dag framleis er under 18 år.

Frå før er ein lokal Ap-topp i 50-åra dømd til fengsel for overgrep. Både i mai og august er det fastsett saker mot i alt fire menn som skal ha utført overgrep, nokre av dei kvar for seg og to av dei saman.

Elleve menn tiltalt eller siktet for overgrep mot samme gutt

I tillegg er fem menn sikta, noko som betyr at det totalt er snakk om minst tolv menn som seksuelt har utnytta guten. Fleire er skulda for å også ha betalt med alkohol og pengar.

TV 2 veit at ein av dei sikta i saka seinast denne veka vart pågripen av politiet og kalla inn til avhøyr.

Politiet meiner guten først og fremst har kome i kontakt med vaksne menn gjennom datingappen Grindr.

Som TV 2 tidlegare har skrive, har politiet likevel fått kritikk for etterforskinga av dei ulike overgrepssakene mot guten.

Bistandsadvokat Sigurd Klomsæt meiner politiet har undersøkt altfor lite av datamaskinar og mobiltelefonar. 

Og difor ikkje avklart ordentleg om nokre av overgrepa var organiserte mellom dei mange tiltalte eller sikta i sakskomplekset.

KRITISK: Bistandsadvokat Sigurd Klomsæt har langa ut mot politiet si etterforsking av overgrepssakene mot hans klient. Foto: Frode Sunde / TV 2

Måtte utsette rettssak

Ei av rettssakene i vår, mot ein barne- og ungdomsarbeidar, er utsett til august.

– Den nye dokumentasjonen medfører inga endring i politiets vurdering av om overgrepa var organisert. Som sagt tidlegare meiner politiet at dei fleste mennene møtte fornærma uavhengig av kvarandre via ein app, seier politiadvokat Else Saltveit Lokna til TV 2.