Bestemor Britt (80) har kapra hjartet til mange på TikTok og Instagram

« Du! I-i-idioten! Kva er det du gjer sånn med ho bestemor for? Sindre!!!»

Det seier bestemor Britt Tove Jørgensen. Ho har akkurat blir overraska av barnebarnet, som filmar utbrotet, medan ho står på kjøkkenet og bakar i Medby på Senja.

Det er berre ein av mange videoar som har gjort dei til eit radarpar på TikTok, Instagram og Facebook.

Videoane av utbrota og historiene til den ufiltrerte bestemora blir sett mellom 6 og 10 millionar gongar i månaden på sosiale medium.

Det er barnebarnet Sindre Olav Fredriksen som veit kva knappar han skal trykke på for å fyre ho opp.

– Eg er berre meg sjølv, seier Britt.

Bestemora som snakkar om at ho nesten «pisse på seg», kosar seg med ein røyk og konjakk, og som alltid har mat klar til barnebarnet, har verkeleg slått an.

– Eg veit ho er vanvettig artig når ein berre fangar dei rette augeblikka, seier barnebarnet Sindre.

• Sjå også: Slik blei bestemor kjendis.

Starta med jakt etter ny mann

Det heile starta med julekalenderen «Tre nøtter til bestemor» for mediehuset Folkebladet i 2019.

Gjennom 24 episodar prøvde barnebarnet å finne ein ny mann til bestemora.

Serien blei derimot sett av rundt 200.000. Og det blei ein sesong til.

Så kom «The Real Bestemor» på ulike sosiale medium.

TikTok var siste kanal ut for duoen.

– Den første videoen la eg ut på kvelden. Neste dag var det allereie fleire hundre tusen visningar. Når det skje på ein kanal som er for unge, då når ho verkeleg alle, seier Sindre.

Dei rister begge på hovudet nå dei pratar om det.

– Eg forstår det eigentleg ikkje. Det skal ikkje gå an, legg bestemor Britt til.

– Det er heit rått. Eg klarer eigentleg ikkje heller å ta inn over meg at videoane til saman har 10 millionar visningar i månaden, seier Sindre mens han skrollar.

Dette er til samanlikning på høgde med de mest populære TikTokerne i Norge.

• Les også: Unge søker råd frå eldre på TikTok.

På noregsturné med barnebarnet

Det blei ingen ny bestefar på Sindre.

Men etter at radarparet kom på sosiale medium, har mange trykt ho til sitt bryst.

– Kor enn eg kjem, spør alle: «Kor e ho bestemor?» Folk drit i meg om ikkje ho er med, seier Sindre og ler.

– Spør folk deg kor Sindre er når dei møter deg?

– Nei, dei er berre oppteken av meg, seier Britt flirfullt.

No har dei tatt steget frå skjerm til scene.

Førestillingane går for fulle hus rundt om landet.

Britt blir ikkje nervøs i det heile tatt.

– Nei, korfor skulle eg bli det?

Barnebarnet har underhaldning som sitt levebrød, men:

– Når det kjem til å gå på scenen, skulle ein trudd det var ho som hadde dette som fag. Eg derimot hell på å pisse meg ut, fordi eg e så nervøs.

Etter ei førestilling i Narvik fortalde fleire i publikum korleis dei oppdaga bestemor Britt på sosiale medium:

Ekspert: – Treff oss i hjartet

Korleis kan ei bestemor på snart 81 år bli ein hit på TikTok og andre sosiale medium?

Barnebarnet har to teoriar.

Det eine er at bestemora er ekte, ærleg og ufiltrert.

Han trur også at mange kjenner igjen forholdet til besteforeldre.

– Vi får meldingar frå folk som har mista sine besteforeldre, som finn trøyst i bestemora mi, seier Sindre.

– Og så er det mange som ikkje har bestemor dei kan gå til, legg Britt til.

Strategisk rådgivar og ekspert på sosiale medium, Astrid Valen-Utvik, er einig med dei.

– Eg synest at det er veldig naturleg at mange vil følge «The Real Bestemor». Vi ser mykje som er strigla, pent og polert, så det treff oss i hjartet når vi ser noko som er ekte og ufiltrert.

Ho trur særleg unge blir glad for det.

– Eg trur unge er primærmålgruppa her. Spesielt når vi ser suksessen dei har hatt på TikTok, trur eg mange kan relatere ho til eigne besteforeldre. Og kanskje er det nokon som føler dei får ei ekstra bestemor av å følge denne kontoen, seier Valen Utvik.

• Les også: Slik blir vi påverka til å kjøpe: – Definerer trendar på sosiale medium.

– Har halde meg ung

At det er bestemor Britt som er stjerna, syns barnebarnet er gøy.

– Ho har blitt heile Noreg si bestemor, seier barnebarnet.

No har radarparet bestemt seg for å gje seg. Både på skjermen og scenen.

Dei avsluttar i haust med ei førestilling i hovudstaden. Også der har billettsalet gått fort.

– Eg trur det er lurt å gi seg på topp, legg Britt til.

– Det skal også bli godt å berre vere Sindre og bestemor – utan mobilen og tenke innhald heile tida, seier Sindre.

I løpet av dei over fire åra som har gått sia julekalender-suksessen, har Britt fleire gongar vore rimeleg sjuk.

Men ho har reist seg kvar gong.

– Eg trur «The Real Bestemor» har vore med på å halde deg ung og spek, og kvikk, seier barnebarnet.

Bestemor Britt nikkar:

– Eg er utruleg glad for alt eg har fått vore med på. Eg har opplevd utruleg mykje på mine gamle dagar. Det er eg evig takknemleg, seier Britt.