Avgifter kutta: – Absurde prisar

Forventningane var lågare drivstoffprisar etter avgiftskuttet ved midnatt onsdag, då avgiftene på bensin blei kutta med 4,41 kroner per liter, og diesel med 2,85 kroner.

Slik blei det ikkje overalt.

I denne saka kan du lese om:

• At fleire opplever at prisane ikkje svara til forventningane
• Kva opposisjonen meiner
• Kva bensinstasjonskjedene svarer
• Kvifor drivstoffprisane har blitt dyrare

– Ikkje ein aprilspøk?

På ein bensinstasjon i Asker steig prisane raskt opp igjen.

– Eg synest det er heilt absurde prisar, seier Deni som NRK treffer på Circle K natt til onsdag.

Han og kameraten Isa skal fylle diesel på bilen før ein tur til Haugesund. Men dei synest det er dyrt.

Då dei to mennene får høyre at avgiftskutta gjeld frå 1. april, kjem reaksjonen raskt:

– Seriøst? Det er ikkje ein aprilspøk?

Nei, det er ikkje ein aprilspøk. Likevel endra ikkje prisane seg så mykje ved denne stasjonen.

• Klokka 23.15: Bensin 26.29 og diesel 29.27
• Klokka 23.59 var prisane litt lågare: Bensin 21.88 Diesel 26.42
• Klokka 00.00 gjekk dei opp igjen: Bensin 26.29 og diesel 29.27

Kutta frå politikarane held ikkje, meiner Deni.

– Prisen bør ned til 17-19 kroner. Det er greitt, synest eg.

Fleire stader ligg prisane på same nivå som før kuttet:

Meiner det er lureri

Ved ein bensinstasjon i Førde kosta diesel 24,99 kroner per liter klokka 23.40.

Klokka 05 hadde prisen stige til 26,81 kroner.

Ein av dei som reagerer, er Arne Nistad, som eig Nistad Transport i Sunnfjord.

– Dette er lureri, rett og slett. I går sette dei dieselprisen opp til nesten 30 kroner, og no er prisen høgare enn han var tidlegare på dagen. Det verkar som ein dårleg aprilspøk, seier han.

Drivstoffpriser på Sogn i Oslo og Høvik i Bærum natt til onsdag.

Foto: Gunnar Bratthammer/NRK

Slik svarar bensinstasjonskjedene:

Frp: – Det er uakseptabelt

Leiaren i det største opposisjonspartiet, Sylvi Listhaug (Frp) reagerer på prisutviklinga.

– Det er uakseptabelt dersom ikkje avgiftsreduksjonane kjem forbrukarane til gode. Frp forventar at prisane blir sette ned tilsvarande avgiftskuttet, inkludert moms. No må drivstoffkjedene kjenne si besøkstid, seier ho til NRK.

Frp var ein del av fleirtalet som stemte for å kutte avgifta.

– Kan ekspertane ha hatt rett i at drivstoffkuttet er eit lite treffsikkert tiltak for å betre økonomien til folk flest?

– Nei, vi forventar at prisane blir sette ned med ein gong.

NRK har sendt ein førespurnad om kommentar frå regjeringa.

Krigen i Midtausten gjer drivstoff dyrare

Idet påska startar 1. april, blir vegbruksavgifta på drivstoff sett til null.

Onsdag i påskeveka er ein av dei travlaste dagane i påsketrafikken, ifølge Statens vegvesen.

Det er på grunn av krigen på Iran at drivstoff har blitt dyrare.

Mellom anna fordi Hormuzsundet, kor mykje olje vanlegvis blir frakta gjennom, er stengt.

Senterpartiet sikra fleirtal for hastebehandling av eit Høgre-forslag om billigare bensin. Alle dei andre raudgrøne partia stemte imot.

Endringa er mellombels og gjeld frå 1. april til 1. september.

Sjølv om avgifta blir kutta, så kan prisane likevel stige som følge av andre faktorar.

Trur prisane vil stige igjen

Forskar meiner prisane fyrst kan falle, før dei gradvis aukar igjen.

– Eg trur pumpeprisane fell tilsvarande avgiftsreduksjonen i byrjinga, før dei så går sakte oppover att, seier forskingsleiar Alexander Schjøll ved Forbruksforskningsinstituttet SIFO til NTB.

Han peikar på at bensinstasjonskjedene må dekke inn eigne kostnader.

– Det er kostnader bensinstasjonskjedene må få tilbake. Dei har ein auka kostnad fordi verdien har auka, og det må dei også bli kompensert for, seier Schjøll.

Samstundes understrekar han at utviklinga er usikker.

– Vi veit eigentleg ikkje kva som vil skje, sidan vi ikkje har erfaring med å kutte avgifter på denne måten, legg han til.