Auka press mot Stoltenberg: – Skugga banen og drog på ferie

Presset aukar mot finansminister Jens Stoltenberg, som har vore alle andre stader enn i Noreg etter at budsjettbråket braut ut førre veke.

– Det er heilt absurd at finansminister Jens Stoltenberg, som er ansvarleg for budsjettforslaget frå regjeringa, har skugga banen dei siste dagane og reist på ferie for å lansere si eiga bok, seier Frp-leiar Sylvi Listhaug.

Medan Ap-leiinga har vore drivne frå skanse til skanse, har sjefen for budsjettet selt bøker i London, Frankfurt, København og Stockholm.

Ein godt eller dårleg tima bokturné (stryk det som passar) som fleire i opposisjonen ironiserer over:

– Den einaste som enno ikkje har innrømt og beklaga at han var med på å gi veljarane feilaktige svar i valkampen, er han som har laga budsjettet, seier Høgre-leiar Erna Solberg.

– For meg verkar det som ei heilt oppsiktsvekkande prioritering, dersom han har vore i europeiske storbyar for å bli bokbada, medan alle andre har måtta rydde i rotet hans her heime.

Ho legg til:

– Eg hadde ikkje tolerert dette frå finansministeren min, dersom eg var statsminister.

Inkluderingsminister for finansminister

Tysdag kveld kom Stoltenberg tilbake til gamlelandet, på same tid som Arbeidarpartiet gjorde retrett og tok gratisferjer og gjeldssletteordninga inn igjen i statsbudsjettet.

Fleire i opposisjonen såg derfor fram til å høyre Stoltenberg forklare seg i Stortinget onsdag formiddag, der det er tradisjon for at finansministeren (eller statsministeren) møter til første spørjetime etter budsjettframlegget.

I staden sende regjeringa justis- og beredskapsminister Astri Aas-Hansen og arbeids- og inkluderingsminister Kjersti Stenseng.

Ikkje godt nok, ifølge dei som meiner at finansministeren har vore missing in action.

– President eg registrerer at verken statsminister eller finansminister er i salen i tråd med vanleg praksis etter at eit budsjett er framlagd, kommenterte Bent-Joacim Bentzen, som er justispolitisk talsperson i Senterpartiet.

Stortingsrepresentant for Sogn og Fjordane, Erling Sande (Sp), seier at det «i beste fall er spesielt» at Stoltenberg ikkje møter:

– Når statsministeren, helseministeren og fleire av toppane i Ap gjev inntrykk av at dei ikkje hadde oversikt over eit statsbudsjett som var ferdig, så hadde det vore mange viktige spørsmål å stille finansministeren om budsjettprosessen.

Det er første gong på ni år at verken statsministeren eller finansministeren kjem til første spørjetime i Stortinget etter statsbudsjettet.

Finanspolitisk talsperson i Frp, Hans Andreas Limi, meiner det er eit spørsmål om respekt:

– Det hadde vore naturleg å vise såpass respekt for Stortinget at han gjorde det, seier han til E24.

Statsministerens kontor svarer at «det går på omgang mellom statsrådane» kven som stiller i spørjetimen, og at statsministeren og finansministeren kjem til å stille «seinare i haust».

Onsdag ettermiddag kom finansminister Jens Stoltenberg (Ap) til Stortinget for å møte pressa der.

Han seier det er beklageleg at saker Arbeidarpartiet hadde ført valkamp på blei tekne ut av statsbudsjettet.

– Det var ein alvorleg feil. Då er då på sin plass å beklage. Og så er det viktig å rette opp. Gjennom helga har vi hatt møter og samtalar som gjorde at vi måndag gjorde om desse beslutningane, og no er desse tinga lagt inn igjen.

Han vil ikkje gå inn på når kutta av gratisk ferjer og nedskriving av studiegjeld blei gjort, men seier det til sjuande og sist var Finansdepartementet som tok avgjerda.

– Kutt kjem som regel frå Finansdepartementet. Slik er det i dei fleste regjeringane.