Arne Bye: – Eg har trekt alle tidlegare erkjenningar

Onsdag blir den tidlegare kommuneoverlegen igjen framstilt for varetektsfengsling.

Bye ønsker å bli lauslaten frå varetektsfengslinga.

– Eg anser meg som ikkje straffskyldig og eg har trekt alle tidlegare erkjenningar som er gjort, fortel Bye.

Han seier han ikkje får førebudd seg godt nok til ankesaka når han sit i varetekt.

Dømt til 21 år i fengsel

I juni falt det dom i saka mot Arne Bye. Bye blei funne skyldig i 70 tilfelle av valdtekt og 82 tilfelle av å ha misbrukt stillinga si for å oppnå seksuell omgang.

Tingretten dømte Bye til 21 år i fengsel.

Under rettssaka erkjente Bye straffskyld for å ha valdtatt 21 kvinner og for 44 tilfelle av å ha misbrukt stillinga si.

Bye har anka dommen. Sidan dommen derfor ikkje er rettskraftig sit han enno varetektsfengsla.

Det gir ikkje gode forhold for å førebu seg til ei eventuell ankesak, seier Bye.

– Saksomfanget, knytt til hovudforhandlinga, er på rundt 40.000 sider. Og det er grovt rekna rundt 6000 timar med video. I tillegg har eg om lag 10.000 sider med eigne notat, fortel Bye.

Bye seier forhalda i varetekt gjer at han ikkje får førebudd seg på ein god måte. Han seier tilgangen til dokumenta og PC er dårleg.

– Det er ein stor del av videoane som eg aldri har sett.

Bye fortel også at det er vanskeleg å kommunisere med forsvararane sine mens han sit i fengsel. Det gjer det vanskeleg å førebu seg på det som kan bli ei ny runde i retten.

– Moglegheitene for å gå gjennom saka og gjere ankeførebuingar i fengselet er håplaus, seier Bye.

Fryktar for eigen sikkerheit

Bye fortel at han i fengsel har opplevd fleire drapstruslar frå andre innsette.

– Dei har skrive på bordplata i fengselet at eg må bli drepen.

Bye fortel at han derfor blir heldt borte får andre innsette og ikkje deltar på aktivitetar i fengselet.

– Det inneber at ein blir ekstremt understimulert.

Da han blei framstilt for varetektsfengsling i mai fortalde han sjølv bad om å sitte i isolasjon i starten av fengselsopphaldet.

Dette følte han var nødvendig på grunn av eigen sikkerheit, fortalde Bye.

Bye fortel også at han er plaga med dårleg helse i fengselet. Det blir ikkje gjort tilretteleggingar for plagene hans, fortel han.

Meiner mediedekninga har vore tendensiøs

Også mediedekninga av saka meiner Bye har vore mangelfull.

– Media har etter min påstand dekt saka veldig tendensiøst.

Han seier dekninga har vore ein belastning.

– Medieeksponeringa har sjølvsagt vore ein betydeleg tilleggsbelastning, men som samtidig skulle tilseie at eg får lov til å forklare meg skikkeleg.

Nye forsvararar

Etter det kom dom i saka bytta Bye forsvararar.

Frode Wisth og Linn Haug Holm representerer no den tidlegare kommuneoverlegen. På grunn av saka sitt omfang blei også Erik Svingen Bjørgo oppnemnt som ein tredje forsvarar.

Frostating lagmannsrett har sette av 17 veker til å behandle ei eventuell ankesak som vil begynne 28. oktober.

Lagmannsretten har moglegheit til å «ankesile», det vil seie at dei kan nekte å behandle ankesaka.