Skulle få Frosta tilbake på beina: Peiker på destruktivt maktspel og tausheit rundt Arne Bye

Same haust som rettssaka mot den tidlegare kommuneoverlegen Arne Bye begynte, sette Frosta kommune i gang folkehelseprosjektet «Best sammen!».

No har prosjektleiar Tor Erik Rønne sagt opp, mindre enn eitt år etter han blei tilsett.

NRK har fått innsyn i oppseiinga.

Der skriv Rønne at sentrale autoritetar på Frosta utøvar meir og mindre skjult motstand mot prosjektet i eit destruktivt maktspel.

Maktspelet fremmer tausheit rundt alt som vedrører Arne Bye, meiner Rønne.

Ordføraren og kommunedirektøren i Frosta kjenner seg ikkje igjen i det Rønne beskriv.

I november sa også den tidlegare kommunedirektøren opp.

Meiner prosjektet blir undergrave

Rønne blei tilsett som prosjektleiar i august. Prosjektet skulle skape positivitet i lokalsamfunnet som var prega av saka mot den tidlegare kommuneoverlegen.

– Når eit heilt samfunn blir sterkt råka og belasta, er det godt å samle seg som eit fellesskap, sa prosjektleiar Tor Erik Rønne til NRK i november.

I oppseiinga skriv Rønne at prosjektet blir undergrave og at det derfor ikkje er mogleg å fortsette arbeidet:

Til NRK stadfestar Rønne at han har sagt opp. Han ønsker ikkje å gå inn på den konkrete grunnen til at han no gir seg som prosjektleiar.

– Sjølvsagt er det ikkje ønskeleg å seie opp og det er med tungt hjarte at eg gjer det, seier Rønne.

Les heile oppseiinga Rønne sende til kommunen:

Kommunedirektøren slutta i fjor

I november sa også kommunedirektør i Frosta kommune, Endre Skjervø, opp.

Skjervø viste til usemje med ordføraren om kommunikasjon rundt saka mot Arne Bye som grunnen for oppseiinga.

– Det har vore vanskeleg å balansere behovet for tydeleg kommunikasjon og openheit i Arne Bye-saka, opp mot ønsket frå politisk hald om å halde igjen og ikkje bidra til førehandsdømming, sa Skjervø da han sa opp.

Kommuneleiinga kjenner seg ikkje igjen

Ordførar i Frosta kommune, Frode Revhaug, seier at arbeidsgivaransvaret for tilsette i kommunen ligg hos kommunedirektøren.

– Som ordførar har eg ingen kommentarar til at tilsette i kommunen ønsker å slutte.

Revhaug seier han støtter «Best sammen!»-prosjektet.

– Det er brei politisk einigheit om at «Best sammen!» er eit viktig arbeid, og eg opplever at eit samla kommunestyre er einige om dette.

Prosjektet vil bli vidareført, seier ordføraren.

– Saka Arne Bye er omfattande og krevjande for mange. Den har no gått føre seg i tre år, med eit stort medietrykk.

Les heile svaret frå Revhaug her:

Kommunedirektør i Frosta, Anniken Hastadklev, seier ho ikkje kjenner seg igjen i at Rønne skriv at støtta frå politisk og administrativt hold er «kritisk låg».

– Eg kan berre svare på det administrative og der kjenner eg meg ikkje igjen.

Hastadklev starta i jobben som kommunedirektør 1. april.

– Vi har sidan påske hatt vekevise styringsgruppemøte i «Best sammen!»-prosjektet, kor prosjektleiaren har deltatt.

Heller ikkje påstandane om maktspel eller ein kultur der ein teier rundt saka mot Arne Bye kjenner ho seg igjen i.

Ho meiner dei er open nok om saka mot Bye på Frosta.

– Det meiner eg at vi er.

– Nesten ein katastrofe

Kommunedirektør Anniken Hastadklev stadfestar til Frostingen at Rønne fråtrer stillinga si 3. august.

– Det er nesten ein katastrofe at han har gjort det, seier Trine Haug om oppseiinga.

Ho er leiar for frivilligsentralen i Frosta og sit i prosjektgruppa til folkehelseprosjektet.

I perioden 2015 til 2019 var Haug ordførar i Frosta for Senterpartiet.

At Rønne no har sagt opp er eit stort tap for prosjektet og lokalsamfunnet, seier ho.

– Det er veldig beklageleg og veldig dumt.

Prosjektet har vore viktig for lokalsamfunnet som det siste året har blitt prega av ei lang rettssak mot den tidlegare kommuneoverlegen, fortel Haug.

– Vi treng nokon som kjem utanifrå med litt friskt blod og nye tankar og som både utfordrar oss og lærar oss å kjenne på nytt.

Fryktar lite openheit

– Det er kjempesynd at dette skjer no, seier Randi Vinge om at Rønne har sagt opp.

Ho er ei av kvinnene som varsla om Arne Bye i 2006. Vinge fortel at ho ikkje har nytta seg av «Best sammen»-prosjektet.

For ho har andre måte vore betre for å handtere saka ho har vore ein del av.

– Men eg synest det er kjempesynd at dette skjer no. Det er akkurat no i denne perioden vi treng Tor Erik og dette prosjektet hans.

Ho peiker på at Bye har anka dommen og fått nye forsvararar. No må dei fornærma kvinnene førebu seg på at det kan bli ein ny runde i retten.

– Mange nye aktørar skal inn og sjå disse særs private videoane. Både nye dommarar og nye advokatar.

Vinge seier det no er viktig at Frosta-samfunnet står bak dei som er råka.

– Ikkje berre vi som skal førebu oss på ein ny rettsrunde, men det er også veldig viktig at nokon står klar og kan assistere menneska bak dei frikjente saka, dei påførte rundt og dei som er så tøff at dei melder Bye til politiet no.

Også Rakel Løvrød reagerer på at Rønne har sagt opp.

– For at vi skal kome oss vidare, både som enkeltpersonar, men også som samfunn og bygd er vi nøydd til å ta realitetane innover oss, seier Løvrød.

Det var varselet frå henne som utløyste etterforskinga av Arne Bye. Ho seier det er viktig at lokalsamfunnet anerkjenner det som har skjedd og bidreg til openheit.

– Går vi motsett veg og teier enda ein gong, slik eg oppfattar at kommunen gjer no, vil dette vere historia som gjentar seg på same måte ved at det blei hysja ned i 2006.

«Best sammen!» har vore viktig for å skape openheit, seier Løvrød.

Lise Pettersen Olsen er ei anna av kvinnene som er fornærma i saka. Ho er også tilsett i Frosta kommune.

Da kommunen sette i gang prosjektet i november blei ho glad.

– Det gav inntrykk av at Frosta kommune tok saka på alvor.

Når Rønne no gir seg er ho bekymra for kva som skjer vidare.

– For å halde eit prosjekt i gang på Frosta trengst det ein pådrivar. Kven skal det vere no?, seier Olsen.

Kan bli ankesak i oktober

I nesten fire månader gjekk rettssaka mot Arne Bye i Trøndelag tingrett mellom november og februar.

Tingretten fann Bye skyldig i 70 valdtekter og 82 tilfelle av å ha misbrukt stillinga si for å oppnå seksuell omgang. For dette blei Bye dømt til 21 år i fengsel.

Det har sidan blitt klart at Bye ankar alt han er dømt for.

Frostating lagmannsrett har sette av 17 veker til å behandle ei eventuell ankesak som vil begynne 28. oktober.