Kreftregisteret: Historisk låg førekomst av livmorhalskreft

Onsdag publiserte Kreftregisteret nye tal for 2024.

Dei viser at kreftførekomsten held seg stabil i Noreg, skriv dei i ei pressemelding publisert på FHI.

Blant menn viser fleire av dei største kreftformene tilbakegang, mellom anna lungekreft og prostatakreft, som har hatt ein nedgang på 10 prosent det siste tiåret.

Den aller største tilbakegangen er likevel blant kvinner: Det har vore ein kraftig nedgang i førekomsten av livmorhalskreft.

I 2024 var det registrert 269 tilfelle av denne kreftforma.

– Lågare førekomst enn dette har vi aldri registrert før, så dette er historisk, seier Giske Ursin, direktør i Kreftregisteret.

Nedgangen skuldast auka screening med HPV-test og vaksinering blant yngre kvinner.

Ursin seier dei særleg ser at førekomsten går ned blant kvinner under 30 år.