Arne Bye: – Eg har trekt alle tidlegare erkjenningar

Onsdag blei den tidlegare kommuneoverlegen i Frosta igjen framstilt for varetektsfengsling.

Bye ønska å bli lauslaten.

– Eg anser meg som ikkje straffskyldig og eg har trekt alle tidlegare erkjenningar som er gjort, fortel Bye.

Han seier han ikkje får førebudd seg godt nok til ankesaka når han sit i varetekt.

Men tingretten forlenga fengslinga og bestemde at Bye kan bli heldt i varetekt i åtte nye veker.

– Avgjersla vil bli anka.

Det skriv Bye sin forsvarar, Eirik Svingen Bjørgo, i ei tekstmelding til NRK.

Dømt til 21 år i fengsel

I juni falt det dom i saka mot Arne Bye. Bye blei funne skyldig i 70 tilfelle av valdtekt og 82 tilfelle av å ha misbrukt stillinga si for å oppnå seksuell omgang.

Tingretten dømte Bye til 21 år i fengsel.

Under rettssaka erkjente Bye straffskyld for å ha valdtatt 21 kvinner og for 44 tilfelle av å ha misbrukt stillinga si.

Bye har anka dommen. Sidan dommen derfor ikkje er rettskraftig sit han enno varetektsfengsla.

Det gir ikkje gode forhold for å førebu seg til ei eventuell ankesak, seier Bye.

– Saksomfanget, knytt til hovudforhandlinga, er på rundt 40.000 sider. Og det er grovt rekna rundt 6000 timar med video. I tillegg har eg om lag 10.000 sider med eigne notat, fortel Bye.

Han seier tilgangen til dokumenta og PC er dårleg.

– Det er ein stor del av videoane som eg aldri har sett.

Bye fortel også at det er vanskeleg å kommunisere med forsvararane sine mens han sit i fengsel. Det gjer det vanskeleg å førebu seg på det som kan bli ei ny runde i retten.

– Moglegheitene for å gå gjennom saka og gjere ankeførebuingar i fengselet er håplaus, seier Bye.

Fryktar for eigen sikkerheit

Bye fortel at han i fengsel har opplevd fleire drapstruslar frå andre innsette.

– Dei har skrive på bordplata i fengselet at eg må bli drepen.

Bye fortel at han derfor blir heldt borte får andre innsette og ikkje deltar på aktivitetar i fengselet.

– Det inneber at ein blir ekstremt understimulert.

Da han blei framstilt for varetektsfengsling i mai fortalde han at han sjølv bad om å sitte i isolasjon i starten av fengselsopphaldet.

Dette følte han var nødvendig på grunn av eigen sikkerheit, fortalde Bye.

Bye fortel også at han er plaga med dårleg helse i fengselet. Det blir ikkje gjort tilretteleggingar for plagene hans, fortel han.

Fengselstilsett vitnar

Ein tilsett i fengselet der Bye sit varetektsfengsla møter i retten over videolink for å vitne.

– I ei stor sak som dette, korleis er det med tilgang på forsvarar?, spurte Bye sin forsvarar Eirik Svingen Bjørgo.

Den tilsette fortel at dei forsøker å la advokatar få så god tilgang til klienten sin i så stor grad som mogleg.

– Men samstundes er det noko med at vi har ein del andre eksterne og pårørande som skal inn til besøk.

Om sommaren forsøker dei å gjere unna besøk frå advokatar før klokka 15.30, fortel han.

Den tilsette svarte også på spørsmål om tilgang til PC og saksdokument, Bye sin helse og sikkerheit, samt soningsforhold.

Ber om at Bye blir lauslaten

I sitt avslutningsinnlegg argumenterer Bjørgo for at Bye må bli lauslaten.

– Kort oppsummert vi vil ikkje få moglegheit til å etablere eit effektivt forsvar, seier Bjørgo.

Han viser til at forhalda i fengselet gjer at det ikkje er mogleg å førebu seg.

– Han manglar tilgang til alle dokumenta, manglar fasilitetar for å gjennomgå og vurdere dokumenta, og han manglar rammer for eit tilstrekkeleg samarbeid og koordinering saman med sine forsvararar.

Bjørge peiker på at Bye har fått nye forsvararar som må sette seg inn i saka.

– Her er det eit poeng at det er nye forsvararar. Vi har ikkje noko forkunnskap, kjenner ikkje bevisa og vi startar på nytt.

Tingretten meiner det burde vere mogeleg å legge betre til rette for at Bye og forsvararane kan førebu seg til ei eventuell ankesak.

Dersom det ikkje er mogeleg i fengselet, meiner tingretten at politiet og kriminalomsorga bør vurdere om Bye kan møte forsvararane utanfor fengselet nokre gonger.

Vil halde Bye fengsla

Politiadvokat Anette Strøm Røsholdt fortel at dei ber om at Bye blir fengsla i åtte nye veker.

Ho viser igjen til allmenta si rettsfølelse som grunnlag for fengslinga. Det same har politiet gjort tidlegare.

Og tingretten er einig med politiadvokaten i omsynet til allmenta si rettsfølelse.

Sidan sist gong Bye blei varetektsfengsla har det kome dom i saka.

– Eg meiner derfor at omsynet til den allmenne rettsfølelsen står sterkare i dag enn det har gjort ved tidlegare fengslingar, seier Røsholdt.

Røsholdt viser også til at Bye ikkje blei varetektsfengsla før etter at saka mot han var ferdig i tingretten.

– Han hadde gode moglegheiter og lang tid til å kunne førebu seg godt og grundig og han har dermed vore betre stilt enn veldig mange andre i liknande situasjonar.

Ho seier påtalemakta forstår at det kan vere vanskelegare å førebu forsvaret sitt frå fengsel.

– Samstundes meiner vi at både fengselet og politiet legg til rette sånn at han har moglegheita til å få førebudd sitt forsvar på ein god nok måte, seier ho til NRK etter rettsmøtet.

Nye forsvararar

Etter det kom dom i saka bytta Bye forsvararar.

Frode Wisth og Linn Haug Holm representerer no den tidlegare kommuneoverlegen. På grunn av saka sitt omfang blei også Eirik Svingen Bjørgo oppnemnt som ein tredje forsvarar.

Frostating lagmannsrett har sette av 17 veker til å behandle ei eventuell ankesak som vil begynne 28. oktober.

Lagmannsretten har moglegheit til å «ankesile», det vil seie at dei kan nekte å behandle ankesaka.