Vilje (23) får stor støtte etter brann: – Tusen takk

23-åringen Vilje Juvskås, som er busett i Vinje, er trans og har engasjert seg i kampen for rettane til skeive.

Dei siste åra har ho arrangert pride-markeringar fleire stader i Vest-Telemark.

Natt til torsdag brente garasjen hennar ned.

No får ho mykje støtte.

– Tusen tusen takk for alle fine helsingar i ei tid som er vond og rar.

Det skriv Juvskås i ei tekstmelding til NRK i kveld.

Politiet etterforskar brannen som mogleg hatkriminalitet.

Mange viser støtte

Hendinga skaper stort engasjement i Vinje. I sosiale medium har mange komme med støtteerklæringar til Juvskås.

Ho la sjølv ut eit innlegg på Facebook dagen etter brannen. Det har fått over tusen reaksjonar i form av emojiar. I tillegg har innlegget 189 kommentarar og er delt 74 gonger.

Ei av dei som har vist støtte er Anne Bjørgunn Nordjore. Ho bur i nærleiken av 23-åringen.

– Eg kjente at eg blei skikkeleg lei meg.

Nordjore håpar Juvskås kjenner at mange bryr seg og ønsker å hjelpe henne.

– Slik at ho ikkje er i tvil om at vi ønsker at ho skal vere her.

Line Omland Eilevstjønn beskriv nyheita om brannen som eit sjokk. Ho seier at ho føler med 23-åringen.

– Eg veit at det ikkje er lett å vere den ho er i eit bygdesamfunn. Det burde vere lett, men det er nok dessverre ikkje det.

Eilevstjønn seier ho er glad for at mange har valt å engasjere seg etter det som har skjedd.

– Eg håpar ho ser det og kjenner seg støtta.

– Heilt forferdeleg

Signe Vinje bruker sterke ord for å beskrive det som har skjedd i heimkommunen.

– Kva tenker du når du høyrer om det som politiet nå etterforskar som mogleg hatkriminalitet?

– Det er heilt forferdeleg, og eigentleg pinleg at slike ting skjer i Vinje.

Ho opplever at dei aller fleste støttene 23-åringen, og seier det er mange som har gitt uttrykk for det etter det som har skjedd.

– Eg håpar Vilje kjenner på all støtta ho får, og at ho legg mest vekt på den, ikkje på hatet som kjem frå nokre få.

Har fleire teoriar

Politiet jobbar med å samle inn informasjon som kan bidra til å oppklare saka, seier Sigrid Dahl. Ho er politistasjonssjef i Midt- og Vest-Telemark.

– Kva slags haldepunkt har dykk for at brannen er påsett?

– Omstenda gjer at det er éin av teoriane våre. Sidan garasjen låg nær huset, etterforskar vi også om det kan ha vore ein intensjon om å sette fyr på huset.

Politiet ser brannen i samanheng med to tidlegare meldingar til politiet. Ein frå Juvskås sjølv, etter at nokon kasta ein stein inn kjøkkenvindauget hennar.

Den andre meldinga er frå kommunen etter at eit pride-flagg blei riven ned.

Håpar på fleire tips

Ingen personar er så langt sikta eller mistenkte i saka.

Det er Juvskås si tilknyting til ulike pride-arrangement og tidlegare trakassering som gjer at politiet etterforskar brannen som mogleg hatkriminalitet, opplyser Dahl.

Politiet ønsker framleis tips om ein mann som blei observert i området før brannen, og informasjon om ferdsel mellom Dalen og Åmot i tidsrommet frå onsdag kveld til torsdag morgon.

– Vi har fått nokre tips, men vil gjerne ha fleire, seier Dahl.

For ordens skuld har Line Omland Eilevstjønn tidlegare vore tilsett i NRK.