Vil melde Felleskjøpet til politiet for søndagsopne butikkar

Våren har så smått byrja å gjera seg gjeldande rundt om i landet, og med det kjem det mykje pusling med hage og hus.

Dette vil Felleskjøpet gjera butikk på, og vil halde 36 butikkar søndagsopne i tida framover.

– Dette er eit tilbod kundane våre har etterspurd. For mange nordmenn er søndagen den store hagedagen, og det er viktig for oss å kunne tilby våre produkt også på desse dagane, seier konserndirektør for butikk i Felleskjøpet Agri, Lasse Erik Moen, i ei pressemelding.

– Brot på lova

Ved Felleskjøpet i Åsane i Bergen møter NRK forbundsleiar Christopher Beckham i Handel og Kontor.

– Her står det tre pallar med stemorsblomar utanfor døra. Dette er ikkje eit hagesenter, seier han.

Hagesenter er blant dei som har unntak frå lovverket som seier at utsalsstader skal halde stengt på søndagar. Her er dei i godt selskap med til dømes små daglegvarebutikkar, bensinstasjonar, kunstgalleri og restaurantar.

– Me meiner difor at Felleskjøpet vil driva ulovleg, dersom dei held søndagsope. Me kjem til å melda butikkar som har ope til politiet. Søndagar skal vera ein fridag for dei tilsette, seier Beckham.

Vil ikkje selja gardsutstyr

Moen i Felleskjøpet seier at opninga av butikkane skal vera i tråd med gjeldande regelverk.

Mellom anna skal ikkje butikkane tilby varer som er retta mot næringsdrivande og gardsdrift.

– Men me veit at også mange bønder nyttar søndagen til hobbydyrking og hagestell, og at det er slike varer me sel mest av i helgehandelen, skriv Moen i ei pressemelding.

I Åsane seier hovudtillitsvald i LO-utvalet i Felleskjøpet, Elisabeth Slethaug Nilsen, at ingen av dei tilsette der ønskjer å jobba søndagar.

– Blomar er absolutt ikkje det me sel mest av, seier ho.

Etter planen skal dei tilsette jobba kvar fjerde søndag, fortel Nilsen.

– Det vil bli kompensert med 100 prosent tillegg. Det er det einaste positive i denne saka, seier ho.