Varsla politiet om kidnapping – kjøpte eigentleg sex

No er ein 28 år gamal mann dømd til fengsel i 30 dagar i ei tilståingssak i Oslo tingrett.

Det var i oktober i fjor at politiet i Oslo blei varsla om at mannen hadde blitt kidnappa frå bustaden sin av fleire menn.

I tiltalen kjem det fram at 28-åringen fekk advokaten sin til å fortelle politiet om han var «dopa ned, frakta til ein leilegheit på Torshov og utsett for vald og trugslar med skytevåpen».

Politiet rykka ut

Kvifor han varsla via advokaten kjem ikkje fram i dommen. 

Men det førte uansett til ein politiaksjon der også politiets utrykkingseining vart involvert. 

Dei braut opp døra til den aktuelle leilegheita. I staden for for «fleire menn», var det ei kvinne og ein mann til stades der.

I denne leilegheita var det noko heilt anna som hadde gått føre seg.

Kidnapping var sexkjøp

For i realiteten hadde ikkje mannen verken blitt kidnappa eller utsett for vald og/eller trugslar.

«Han var oppteken med å kjøpe seksuelle tenester av [namn på kvinne], samstundes som hans eigen sambuar forgjeves forsøkte å komme i kontakt med han over fleire timar», står det i tiltalen som er tatt ut mot mannen.

I Oslo tingrett i går la mannen alle korta på bordet og tilstod den oppdikta kidnappinga.

– Ransaka utan grunn

Han tilstod også kjøp av sex med den aktuelle kvinna.

Oslo tingrett meiner isolert at 36 dagar fengsel er riktig straff for den oppdikta historia om kidnappinga. Dommaren påpeiker at politiet brukte store ressursar på utrykkinga.

– Leilegheita til to menneske vart ransaka utan grunn, mobiltelefonane deira vart fråtekne og dei vart avhøyrd som mistenkte av politiet, skriv dommaren.

28-åringen får likevel strafferabatt for tilståinga, som gjorde at sjølve rettssaka kunne bli gjennomført på ein liten halvtime i retten.

Der godtok han også dommen på 30 dagar fengsel.