United-sjefen blir «flau» når han ser på tabellen: – Vanskeleg å akseptere

– Korleis skal ein manager for Manchester United kjenne seg i ein slik situasjon? Flau, og det er vanskeleg å akseptere, sa manager Ruben Amorim på pressekonferansen etter tapet mot West Ham.

Dei raude djevlane har hatt ein fiaskosesong i Premier League og ligg foreløpig på 16. plass – noko som kan bli den svakaste ligaplasseringa av klubben sidan Premier League blei innført i 1992. Førre gong dei hamna lågare på tabellen i den øvste divisjonen i England, blei det 21. plass og nedrykk. Det var i 1974.

– For meg er den største bekymringa kjensla av at «det er greitt», sa portugisaren.

– Vi kan ikkje falle så mykje på tabellen, så da er det liksom greitt. Det er det største problemet i klubben akkurat nå, fordi vi mistar kjensla av at vi er ein storklubb – og at det er verdas undergang å tape ein heimekamp, fortsette han.

– Det klart minste problemet

United kan maks nå ein 13. plass i ligaen, men dei har framleis ei gulrot i Europaligaen. Der møter dei Tottenham i finalen, og vinnaren vil få innpass i Meisterligaen neste sesong.

– Eg er ikkje bekymra for finalen, det er det klart minste problemet i klubben, seier Amorim, som seier han kan måtte overlate jobben til nokre andre dersom ting ikkje snur.

Han tok over klubben etter at Erik ten Hag fekk sparken i november. Sidan portugisaren tok over managerjobben har laget vunne seks kampar, spelt uavgjort like mange gonger og tapt heile 13 gonger i ligaen.

NRKs fotballekspert Kristoffer Løkberg er einig i vurderinga til Amorim.

– United er per dags dato eit botnlag i Premier League. Slumpen vil ha det til at dei speler finale i Europa League – ein kamp som kan redde heile sesongen. Det kan gjere at framtida ser litt lysare ut på kort sikt. Men dei kan ikkje tillate seg å stå fram som eit middelmåtig lag mellom europakampane, seier Løkberg.

Han meiner det er altfor lett for dei fleste lag å ta poeng mot dei, sjølv på eige gras. Eksperten viser til det nylege tapet mot West Ham og heimetapet mot Wolverhampton.

– Dei har blitt dårlegare under Amorim. Så enkelt og brutalt er det. Han har hatt meir enn nok kampar til å sette stempelet sitt. Det finst ikkje unnskyldningar. Han har gambla og treft med finaleplassen, men tenk på kor små marginane har vore – blant anna mot Lyon. Kva hadde vi snakka om dersom det hadde gått gale der? seier Løkberg.

Meiner dei er langt unna

NRK-eksperten fortset å refse storklubben, og meiner vegen tilbake til toppen er lang.

– Dei er så langt unna å vere eit topplag som det er mogleg å komme. Den einaste grunnen til at nokon trur dei framleis høyrer heime i toppen, er at dei heiter Manchester United. Ingenting tilseier at dei er eit topp seks-lag, seier Løkberg.

Han understrekar at ein eventuell siger i Europaligaen kan gjere mykje for klubben og kan sørge for at dei kan tiltrekke seg større spelarar på overgangsmarknaden i sommar.

Manchester United-kaptein Bruno Fernandes har i fleire kampar måtte svare for dei svake prestasjonane. Han meiner dei må forbetre seg på ei rekke område.

– Vi har hatt kontroll i mange kampar, men så slepp vi inn mål etter litt kaos i eigen boks. Vi veit at vi har mykje å forbetre i Premier League, seier Bruno Fernandes ifølge Manchester Evening News.

– Vi må vere mykje meir aggressive, komme oftare inn i boksen til motstandaren, vere farlegare og meir effektive framfor mål, seier stjernespelaren vidare.

Det står att to kampar i Premier League. Først ventar Chelsea på bortebane, før dei avsluttar sesongen mot Aston Villa på Old Trafford. Ingen enkle motstandarar igjen, med andre ord.