«Ufred» av Åsne Seierstad vinn Bokhandlerprisen

I boka skriv Seierstad seg gjennom Russland for å forstå og beskrive landet som har invadert Ukraina.

– Det rører meg enormt å få Bokhandlerprisen i år. Arbeidet med boka har vore langvarig og komplisert.

– Eg forventa ikkje at så mange lesarar ville vere interesserte i å dykke ned i djupna av Russland slik dei har gjort, seier Seierstad.

Bokhandlarane sjølve stemmer fram vinnaren av Bokhandlarprisen.

– I ei tid prega av krig og uro, treng vi bøker som gir innsikt og hjelper oss å forstå verda. Prisvinnaren i år er ei slik bok, seier Anne Schiøtz, direktør i Bokhandlerforeningen.

For mens andre reiser bort frå Russland reiser Seierstad inn.

Inngangen i boka blir ein soldat som kjem over grensa til Finnmark.

Andrej Medvedev har rømt frå den berykta Wagner-gruppa, den private hæren som stod bak nokre av dei verste ugjerningane i Ukraina.

Seierstad fortel Andrejs historie, frå barndommen i ein landsby i Sibir, prega av vald, fyll og fattigdom.

Det er nesten 20 år sidan Åsne Seierstad sist skreiv bok frå det tidlegare Sovjetunionen. «Dei krenka» frå 2007 tok for seg krigen i Tsjetsjenia, og særleg skjebnane til barna.

Seierstad har budd og studert i Russland som ung og snakkar språket.

Boka har fått terningkast fem i NRK og seks i VG, men ikkje alle er like glade i boka.

Yulia Pidlisna er Ukrainsk formidlar og skriv i Aftenposten at boka gir henne ein vond smak i munnen.

– Mange meldarar lèt seg fascinere av vald, vodka og mystikk og gløymer at bakteppet er ein høgst reell russisk invasjonskrig mot Ukraina.

– Ukrainsk historie blir framstilt på ein russisk-imperialistisk måte, utan ein einaste fotnote som markerer at det intervjuobjekta i boka fortel, ikkje stemmer overeins med historiske fakta.