Tonje filma vinglete turistar i Vesterålen: – Noko av det verste eg har sett

I Lofoten og Vesterålen har «vinglebilar» blitt eit omgrep.

Tonje Bergersen møtte ein slik denne veka.

– Det er noko av det verste eg har sett. Dette var drygt, seier Tonje Bergersen.

Saman med venninna Amalie Skarding (25) var ho på veg frå Harstad til Sortland i Vesterålen onsdag.

Dei blei liggande bak ein leigebil som køyrde meir og meir vinglete. Delar av køyringa blei filma, og viser tydeleg at bilen fleire gonger låg midt på vegen og over i motsett køyrefelt.

– Vi trudde først dei var litt uoppmerksame, men så blei det berre verre og verre, seier Bergersen.

Ho seier bilen heldt på å kollidere front mot front med bilar som kom mot. Til slutt varsla dei politiet.

Avisa Vesterålen omtalte videoen først.

Bergersen køyrer mykje bil i området, og seier turistar som ikkje er vande til norske vegar har blitt eit vanleg syn.

– Det er djevelsk mykje køyring på den gale side av vegen for tida.

Men eksempelet frå onsdag var ekstra ille, meiner ho.

– At det ikkje har skjedd fleire ulykker er sinnssjukt. Det er nesten synd at dei får lov til å køyre så fritt, seier ho.

Og berre ein dag etter ho observerte dette, gjekk det gale i nabokommunen.

Torsdag blei to personar, begge kinesisk statsborgarar, sende til sjukehus etter ein frontkollisjon på E10 i Hadsel.

Fredag skriv politiet i loggen at de får fleire meldingar om «vinglebilar» i området rundt Svolvær.

– Har ikkje noko på norske vegar å gjere

Bergersen synest det er ubehageleg å tenke på at ho ofte ser liknande køyring på vinterstid.

– Det er skummelt for du veit ikkje kva du møter. Eg har møtt mange som kjem over på mi side.

Bergersen meiner fleire av turistane aldri burde fått køyre i det heile:

– Mange av dei har ikkje noko på norske vegar å gjere, seier Bergersen.

Politiet seier til Bladet Vesterålen at dei var ute på oppdrag knytte til hendinga. Dei bekreftar også at det var ein leigebil med utanlandske turistar.

– Vi har stramma turistane opp, og bede dei vere aktsame i trafikken, seier operasjonsleiar May Wenche Hansen til avisa.

Politiet måtte køyre turistar til flyplassen

Tonje Bergersen er langt frå den einaste som har meldt frå om vinglete køyring på vegar i Nord-Noreg i det siste.

Førre veke fekk politiet i Vågan i Lofoten fleire meldingar om ein bil som køyrde vinglete. Bilen var over i motgåande køyrefelt og køyrde uryddig i fartsgrensene, ifølge politiet.

Da politiet stoppa bilen på fylkesveg 816 Henningsværveien, viste det seg å vere tre asiatiske statsborgarar på ferie.

Det heile enda til slutt med at politipatruljen køyrde leigebilen med turistane dit dei skulle.

– Politiet yter service og sikkerheit, og køyrer leigebilen og personane vidare til Svolvær lufthamn, skreiv politiet i ei melding.

For ikkje lenge sidan stoppa politiet også denne bilen:

Turisten frå Kina skulle berre oppleve fantastisk natur, men mista lappen.

– Det er livsfarleg køyring

– Det er vinglete bilar som hamnar i farlege situasjonar. Dei køyrer ofte midt på vegen eller på feil side av vegen.

Det seier politistasjonssjef i Vest-Lofoten, Ketil Finstad-Steira om køyringa til mange av dei utanlandske turistane i regionen.

Han seier det har blitt stadig meir heilårsturisme dei siste fire–fem åra. Særleg frå desember til mars kjem mange frå Asia for å jakte nordlys, seier han.

– Dei leiger seg leigebil og har ikkje køyreferdigheiter etter køyreforholda i Nord-Noreg.

Han seier politiet har hatt ein auke i meldingar som handlar om dette.

– Det er mange alvorlege meldingar, og det er ikkje alltid vi har kapasitet til å ta oss av det.

Lokalbefolkninga er også bekymra, ifølge han.

– Det er livsfarleg køyring. Politiet er veldig bekymra. Det kan fort skje alvorlege ting.

Han nemner fleire ulykker den siste tida der han meiner det berre er flaks at ulykkene ikkje enda meir alvorleg.

– Så ærleg må eg vere: Vi er bekymra for at det kan smelle ordentleg. Det trur eg dei som bur i Lofoten også tenker.

Bilbergar merkar auke

Håvard Hansen er dagleg leiar i bilbergarfirmaet Assistanse nord med hovudkontor på Sortland i Vesterålen. Han seier dei merka nordlysturismen godt.

– Vi merkar at det blir meir leigebilar på vegane, seier Hansen.

Mange turistar ser noko dei vil ta bilde av og stoppar på stader som ikkje er eigna, ifølge Hansen.

– Det kan vere ei grøft som er snødd att. Då skjønner dei ikkje at det ikkje er noko under snøen. Dei svingar rett av vegen og parkerer. Og der står dei, seier Hansen.

Særleg på vegen mellom Lødingen og Lofoten får dei mange oppdrag knytte til leigebilsjåførar frå utlandet.

Han anslår at turistar i leigebil utgjer 70 til 75 prosent av alle utforkøyringsoppdraga dei får.

Han meiner leigebilselskapa bør krevje meir av dei som skal leige bil:

– Leigebilselskapa skulle eigentleg vore stilte meir til ansvar med tanke på opplæring. Eg har ikkje nokon fasit, men det kunne vore eit digitalt kurs før ein fekk leige ein leigebil i Noreg. Det kunne vore ein ting, seier han.