Tissa på seg sjølv: – Eg ville sjokkere

Om du er glad i underhaldnings-TV har du sikkert lagt merke til at det er éin ting som ofte går igjen.

Nemleg kropp, hud og nakenheit.

Den siste tida har vi sett Else Kåss splitter naken (bortsett frå sko og sokkar) i fyrste program av «Kongen befaler».

Martin Lepperød tissa på seg i «Ikke lov å le på hytta».

Og i den komande sesongen av «24-stjerners julekalender» strippar blant anna Sondre Sundby av seg på overkroppen.

Kvifor er det eigentleg så mykje kropp på TV om dagen i situasjonar der kjendisar ønsker å få merksemd?

Kva er det mest nedrige?

– Eg ville sjokkere.

Det seier komikar Martin Lepperød om tissestuntet sitt i «Ikke lov å le på hytta». Han forklarar at tanken bak det heile var å gjere det mest nedrige han kunne finne på.

– Det har jo vore mykje drygt og nedrig i «Ikke lov å le på hytta» tidlegare, så min idé var å toppe det som hadde vore, humrar han.

Han trur at komikarar og andre TV-personlegdommar tyr til nakenheit nettopp for å skape ein sjokkeffekt.

– Det er ei enkel løysing på eit problem, og det er kort veg til latter og ein reaksjon. Og det å vise kroppen er jo ikkje skadeleg, seier han.

Total overtenning

I den komande sesongen av «24-stjerners julekalender» får deltakarane i oppgåve å halde på merksemda til ei 13 år gammal jente.

Fleire av mennene tar av seg skjorta, deriblant Sondre Sundby.

– Det har brent seg fast i pannebrasken min. Det som skjedde var total overtenning. Konkurranseinstinktet «kicka» rett og slett inn, seier han og ler.

For Sundbys del låg det ingen klar tanke bak det han gjorde, anna enn at han måtte bruke dei verkemidla han hadde for å få merksemd.

– Så det var mykje som skjedde i løpet av dei få minutta der. Eg gjorde mykje ut av meg, og eg gjorde mykje rart, fortel han og humrar av det han fann på.

I ettertid har Sundby innsett kor komisk det både høyrest og sikkert vil sjå ut:

– Det som er morosamt er at idet eg gjekk ut av konkurransen, innsåg eg at eg hadde strippa for ei 13 år gamal jente for å få merksemd, at det skal sjåast av ein million menneske, og at det skal bli sendt i juletider, konstaterer han.

Grenseoverskridande

John Magnus Ragnhildson Dahl er postdoktor i medievitskap på Universitetet i Bergen.

Han forklarar at grunnen til at mange brukar kropp som eit humorgrep er fordi det er noko som er uventa.

– I sosiale situasjonar har vi på klede, så når du tar av dei kleda eller viser deg splitter naken, bryt du eit sosialt skript. Det kan gjere situasjonen humoristisk, seier Dahl.

– I tillegg er det grenseoverskridande og kan bryte eit tabu. For eksempel dette med å vise tissen, eller tisse på seg sjølv, legg han til.

Bæsj og tiss

Dahl trekker vidare fram ein humorteori som heiter «karnevalsteorien». Den går ut på at kroppsfunksjonar og groteske kroppar er grunnleggjande humoristisk.

I det klassiske karnevalet i mellomalderen var bæsj og tiss noko ein gjerne laga humor på.

– Det var vanleg å vise kroppsfunksjonane våre, og gjere dei om til noko ein kunne le av, i staden for å vere noko ekkelt eller skummelt.

Dette kan ein også sjå i dagens samfunn. Men det er ei tynn grense mellom skrekk og humor.

– Det er ein balansekunst, for nokre gongar kan humorforsøk lande meir på sjokksida enn humorsida. Det kjem veldig an på situasjonen, forklarar Dahl.

Det kan også Martin Lepperød bekrefte.

Buksa for stor, tissen for liten

For setting og kontekst har mykje å seie for å oppnå den effekten ein ønsker.

– Eg står ikkje på scena og tissar liksom, seier Lepperød kontant.

Komikaren skulle gjerne ønske seg ein enda større reaksjon frå dei andre deltakarane da han tissa på seg. Kanskje hadde det vore morosamare om urinen hadde laga merke på buksa hans i staden for å renne rett ned på golvet.

– Det var ein bommert det der, at buksa var for stor og tissen for liten, seier han og humrar igjen.

– Men det er gøy når det ikkje går så bra også. Det kan bli humor av det også.

Dette er deltakarane i årets «24-stjerners julekalender:»