Terje (40) mista foten i motorsykkelulukke. No skriv han idrettshistorie i vindtunnelen

Som 23-åring kjøpte Rømuld sin første motorsykkel, men gleda blei kortvarig. Allereie på sin fjerde køyretur sklei han ut i ein sving og krasja i autovernet.

Ulukka var brutal. Hovudnerven og hovudpulsåra i låret blei reven tvers av, og han var tre og ein halv månad på sjukehus.

Totalt måtte han gå gjennom 17 operasjonar.

– Eg var sikker på at eg blei sittande i rullestol. Så då eg fekk beskjed om at eg hadde kjensler i beina og måtte berre amputera det eine, så var det eigentleg ikkje så ille, fortel Rømuld i dag.

I staden for å la amputasjonen frå kneet og ned avgrensa seg, så starta han ein seig kamp for å ta kvardagen tilbake.

Målet hans var å kunne venda tilbake til aktivitetane han elska før ulykka.

– Avgrensingane ligg ofte mest psykisk. Eg har som mål å driva med ting eg kunne gjera før eg mista foten. Når eg får moglegheit til å prøva ting, så gjer eg det, slår han fast.

Skriv norsk idrettshistorie på Voss

Fokuset har no ført 40-åringen inn på ein heilt ny arena.

Rømuld har blitt tatt ut som ein av tre utøvarar på Noregs første satsing i Indoor Para Skydiving (IPS). På norsk: Innandørs fallskjermhopping for personar med nedsett funksjonsevne.

Laget er det første av sitt slag i Skandinavia.

Saman med Sigbjørn Dalen og Aili Kirste Arntzen skriv han no idrettshistorie.

Laget har base i Vindtunnelen på Voss. No trenar dei målretta fram mot Skandinavias aller første noregsmeisterskap i IPS, som skal arrangerast under Ekstremsportveko i juni 2026.

Det langsiktige målet er enda større. Nemleg å representera Noreg i VM i 2027.

Krevjande idrett

Det er ein fysisk og teknisk krevjande idrett.

Med vindhastigheit på opp mot 180 km/t inne i tunnelen skal utøvarane fly eit nøyaktig mønster der dei roterer og tar på sensorar på glasveggen i løpet av 75 sekund.

Dei får minuspoeng om dei tek borti glaset utanfor sensoren.

For Rømuld er det krevjande, men og kjempeartig.

– Eg hamnar i ei boble, og når ein kjenner på meistring så er jo det ei veldig god kjensle, seier han.

Delphine Huet er leiar for Voss Kroppsfykarlag og manager for IPS-laget.

Ho meiner at Noreg er så god på luftsport, at det no er på tide å også inkludera paraidrett i luftsporten.

– Det er ein trygg arena og eit vindauge til ekstremsport, seier Huet.

– Kor langt tenkjer du laget kan nå?

– Eg trur dei kan kome langt. For dei har høg motivasjon og fin energi.

Eit liv i nuet

Etter ulukka har Rømuld utvikla ein sterk filosofi om å utnytta tida han har. Ulukka har ikkje gjort han meir forsiktig, snarare tvert imot.

– Eg lev nok meir no i nuet. Så det å utfordra seg innanfor det som er rimeleg, trur eg berre er sunt, seier Rømuld.

No er blikket retta mot verdstoppen.

– Målet mitt er jo å få delta i NM og VM, og koma på pallen der. Det hadde jo vore heilt fenomenalt om eg hadde fått det til, seier han.