Slaktar trafikkplanar: Tar ikkje omsyn til klima

Fredag kjem Nasjonal transportplan (NTP) for perioden 2025 til og med 2036.

Den viser kva regjeringa ønsker å satse på.

Direktør Bjørne Grimsrud i Transportøkonomisk institutt (TØI) er kritisk til planlegginga av korleis folk og varer skal komme seg frå A til B.

Han meiner det må skje ei endring.

Det er TØI som leverer tala som transportplanen bygger på.

• Det har kome mange lekkasjar frå planane:

Brukar gamle tal for å planlegge framtida

– Om Noreg skal nå dei internasjonale forpliktingane som vi har tatt på oss i forhold til klima og natur, må vi endre måten vi driv samfunnsplanlegging på, seier Bjørne Grimsrud til NRK.

Slik det er i dag, tar ein utgangspunkt i historiske tal og bygger vidare på dei, forklarer han.

Da vil for eksempel auka biltrafikk dei siste åra bli gonga opp og svaret blir at ein må bygge meir veg.

Som kanskje er det motsette av kva ein ønsker å oppnå viss klimamålet skal nåast.

OECD har komme med liknande råd til medlemslanda nyleg, fortel Grimsrud i Energi og klima:

Grimsrud får full støtte av Naturvernforbundet.

– Dette er eit kjempeproblem, seier leiar Truls Gulowsen.

Gulowsen seier regjeringa i denne transportplanen har første moglegheit til å vise at dei tar konsekvensane av klimamål og naturvernavtalar dei har underskrive.

– No kan ein planlegge for den utviklinga ein vil ha, ikkje berre bruke tala for trafikkvekst som argument for å bygge nye vegstrekningar, seier Gulowsen.

Håpar klima er hovudmålet

Transport som vil komme betre ut ved å ta omsyn til klima er nettopp bruk av eksisterande infrastruktur som veg, bane, buss heller enn nye investeringar.

Investeringar som skaper ny trafikk, som ferjefri E39, vil komme dårlegare ut.

I staden for å bygge ned meir natur og auke klimautsleppa, peikar TØI-direktør Bjørne Grimsrud på prisar.

Ved å gjere det billigare å reise når det er mykje ledig plass på tog, ferjar og veg, så treng ein ikkje bygge meir, berre utnytte betre det vi allereie har.

Grimsrud håpar at klima og natur er hovudmålet i transportplanane som kjem fredag.

Regjeringa har fleire mål

Statssekretær i samferdselsdepartementet, Cecilie Knibe Kroglund (Ap) er ikkje einig i at dei ikkje bruker transportplanen til å nå klimamåla.

– Vi har ei overordna målsetting om meir effektiv transport. Og så skal vi nå klimamål, vi skal nå trafikksikkerheit, og vi skal få meir igjen for pengane, seier ho.

På spørsmål om ho forstår at folk er frustrert og skuffa over at ikkje akkurat deira prosjekt blir prioriterte, så seier ho:

– Vi har stor forståing for frustrasjonen som breier seg når planlagde prosjekt ikkje blir sett i gang.

Fredag får vi fasiten, men allereie no er nokon skuffa.

Nå kjem lekkasjane

I dagane fram til NTP blir offentleg, så lek det gjerne ut nyheiter her og der.

Forrige torsdag kom nyheita om at regjeringa vil bruke 23 milliardar kroner på Østfoldbanen, fram til Fredrikstad.

– Det handlar om at vi skal utvikle heile austlandsregionen og bruke tog for å transportere folk ut og inn av byane våre på ein miljø- og klimavennleg måte, sa samferdselsminister Jon-Ivar Nygård (Ap).

I Vestfold og Telemark fryktar dei at alle pengane er oppbrukte på andre sida av fjorden.

Da kan toget bokstaveleg talt ha gått for ytre del av InterCity til Halden, Lillehammer og Skien.

Fylkesordførar Anne Strømøy (H) i Vestfold lever framleis i håpet.

– Først fikk vi høyre at det ikkje skulle kome pengar til nye tiltak. Men så kom nyheita om 23 milliardar til Østfoldbanen. Da ser eg forventningsfullt fram mot at også Vestfold blir prioritert i transportplanen.

Nå jobbar ho og mange politikarar landet rundt med å påverke dei som sit på Stortinget.

Det er nemleg Stortinget som skal vedta transportplanen før dei tar sommarferie og dei kan forandre på ting.