Skandale i USA: Trenarson måtte beklage etter å ha rundlurt spelar

NFL granskar nå korleis Shedeur Sanders sitt private telefonnummer blei leke og brukt til ein falsk telefonsamtale under dag to av draften, melder ESPN.

Mens Sanders framleis venta på å bli drafta fredag, dukka det opp ein video i sosiale medium der quarterbacken fekk ein telefon frå nokon som gav seg ut for å vere New Orleans Saint sin daglege leiar, Mickey Loomis.

– Det har vore ei lang ventetid. Vi kjem til å velje deg ved vårt neste val, men du må vente litt lenger. Beklagar, seier stemma i telefonen, før samtalen blir avslutta.

Undervegs i samtalen takka Sanders for sjansen, men etter at samtalen blei avslutta med ei unnskyldning, vende han seg forvirra til forsamlinga på draftfesten sin og spurde:

– Kva betyr det?

Det viste seg altså at det var nokon som hadde skaffa seg eit i utgangspunktet svært hemmeleg nummer.

– Ingen har det nummeret bortsett frå trenarar for å unngå akkurat desse situasjonane, seier Sanders, som er son av NFL-legenda Deion Sanders.

– Utilgiveleg, flautt og skammeleg

Hovudmannen bak rampestreken var den 21 år gamle Jax Ulbrich, som er sonen til Atlanta Falcons sin forsvarstrenar Jeff Ulbrich.

21-åringen måtte seinare ut og beklage for å ha rundlurt Sanders.

– På fredag gjorde eg ein gigantisk tabbe. Shedeur, det eg gjorde var heilt utilgiveleg, flautt og skammeleg, skriv Ulbrich på Instagram og fortset:

– Eg er så lei meg for at eg tok frå deg denne augeblinken, og det var egoistisk og barnsleg.

Han skriv vidare at han har ringt Sanders og beklaga.

Fann nummeret heime hos faren

Søndag gjekk også Falcons ut og beklaga til legendesonen.

– Atlanta Falcons støtter ikkje denne typen åtferd og vil uttrykke unnskyldninga si overfor Shedeur Sanders og familien hans, som vi har vore i kontakt med og beklaga til, skriv klubben i ei fråsegn på X.

Klubben skriv også at Jax Ulbrich kom over telefonnummeret på ein open iPad da han besøkte heimen til foreldra sine. Sonen skreiv ned nummeret slik at han på eit seinare tidspunkt kunne gjennomføre tulletelefonen, ifølge Falcons.

– Jeff Ulbrich var ikkje klar over dataeksponeringa eller nokon element frå spøken, og blei først gjorde merksam på dette i etterkant, skriv dei.

– Det var tragikomisk, seier Mattis Holt til NRK.

Han har dekt NFL som journalist og kommentator for VG, og driv podkasten Catch om amerikansk idrett.

– Eg syntest synd på Sanders frå før for at han måtte vente så lenge før han blei vald. Han var venta å vere ein av dei første som skulle bli vald, og så måtte han vente til dag tre, seier Holt og fortset:

– Så fekk han denne telefonen frå sonen til Jeff Ulbrich, og trudde han hadde blitt vald. Det var ikkje sant, og det var heilt frykteleg gjort av dei som ringde og frykteleg synd for Sanders.

Fleire tulletelefonar under draften

På ein pressekonferanse laurdag, etter at Sanders blei drafta av Cleveland Browns i femte runde, sa han at han ikkje lét seg påverke av spøken.

– Det hadde eigentleg ikkje nokon innverknad på meg, fordi eg bryr meg ikkje om negativitet eller slike ting.

– Eg synest sjølvsagt det var barnsleg, men alle gjer barnslege ting innimellom, sa Sanders.

Den ferske Cleveland Browns-spelaren skal likevel ikkje ha vore den einaste som blei utsett for tulletelefonar. Ifølge ESPN fekk også den nye Colts-spelaren Tyler Warren ein tulletelefon før han blei drafta i første runde av Indianapolis.

Philadelphia Eagles sin nye quarterback, Kyle McCord, fortalde også at han fekk fleire tulleoppringingar frå nummer tilhøyrande Philadelphia-området på den siste dagen i draften.

Holt fortel at han har høyrt og sett videoar frå tulletelefonar under NFL-draften tidlegare, men aldri der ein trenarson har vore involvert.

– Det er det som gjer dette så unikt, seier han.

Ser ikkje bort frå draft-endring

NFL-journalisten seier det er «litt gammaldags» at ein får vite om ein er drafta frå eit telefonnummer, og trur at NFL gjennom granskinga si av denne saka kan endre på korleis spelarane får beskjed.

– Eg ser ikkje bort frå at det blir ein slags offisiell telefonsamtale eller ei form for offentleg kommunikasjon når spelarar skal ringast i framtida. At spelarar ikkje berre kan bli ringde frå eit tilfeldig telefonnummer, men at det må gå via NFL eller ein kanal, seier Holt.

Etter den falske telefonen til Sanders kunne gjestene hans sjå på TV korleis Saints i staden valde quarterbacken Tyler Shough frå Louisville med det 40.-valet.

Browns-trenar Kevin Stefanski var laurdag tydeleg kritisk til dei som stod bak spøken:

– Folk er idiotar. Det er trist, sa han.

Shedeur Sanders si ventetid tok slutt da Browns valde han som nummer 144 i draften. Han blei den sjette quarterbacken som blei vald, og den andre Cleveland henta. Fredag kveld hadde Browns allereie plukka Dillon Gabriel frå Oregon.