Skal ha blitt sperra inne og mishandla i seks timar: – Eg fekk beskjed om at «no skal du drepast»

– Fleire gongar under hendinga var eg bevisstlaus, fortel den fornærma mannen i Trøndelag tingrett.

Valden skal ha gått føre seg over seks timar i ei leilegheit i Trondheim i fjor sommar.

Dei to mennene erkjenner begge delvis straffskuld for valden, men nektar for å ha sperra han inne.

– Eg trudde verkeleg eg skulle døy.

Fekk beskjed om at «no skal du drepast»

Ifølge tiltalen fekk mannen åtte ribbeinsbrot og ein punktert lunge, samt sår og kutt på store delar av kroppen.

Den fornærma mannen fortel at han og dei to tiltalte mennene i 20- og 40-åra hadde ein liten fest der dei hadde rusa seg på amfetamin og ketamin.

Han fortel at han gjekk heimom ein tur, men blei angripen da han kom tilbake.

– Da eg kom tilbake blei eg stilt inntil veggen.

– Eg fekk skuldingar om at eg var ein såkalla politiinformant, fortel mannen.

Han fortel vidare om at han ikkje kom seg unna.

– Eg blei plassert i ein stol og fekk vite at dersom eg rørte på meg så fekk eg ein øks i ryggen.

Sjølv om han nekta for å vere ein politiinformant starta valden. Han fortel at han blei bunden på armar og bein og kasta inn på badet.

– Eg fekk beskjed om at «no skal du drepast».

Mannen fortel at dei tiltalte mennene tvang i han store mengder LSD.

Undervegs i hendinga var den fornærma mannen inn og ut av bevisstheit, fortel han, og hugsar berre delar av hendinga.

– Eg hugsar NN stod over meg og skar med kniv i halsen og i leppa mi.

Mannen fortel at mennene ønskte å utøve vald lengst mogleg.

– Dei prøvde å ikkje sparke og slå så mykje i hovudet, fordi dei ville halde på lengst mogleg.

– Han gjekk til angrep på meg

– Eg skjønner jo at eg har påført han skader, men eg kjenner meg ikkje igjen i heile beskrivinga, fortel den tiltalte mannen i 40-åra.

Han fortel at hendinga starta med ei usemje rundt at den fornærma mannen hadde hatt kontakt med ein tredjemann som den tiltalte mannen hadde ein dårleg relasjon til.

Usemja utvikla seg til det den tiltalte mannen omtalar som eit «basketak».

– Det var slåstkamp i periodar.

Den tiltalte mannen forklarar at han hugsar at han brukte ei klubbe under hendinga.

– Han fekk vel nokre kakkar med den på eit tidspunkt, for han gjekk til angrep på meg.

– Eg forsøkte å halde han i ro, men det hjelpte ikkje.

Å ha brukt kniv eller andre reiskap kan han ikkje hugse å ha gjort. Han fortel at usemja truleg starta med at han tok tak i handa til den fornærma mannen.

– Hadde det vore eit alternativ å berre kaste han ut?, spør tingrettsdommar Erik Lereim.

– Det hadde vel vore ein moglegheit kanskje.

– Men ein må jo prøve å prate med folk og finne ut kvifor det skjer.

Fekk helsehjelp først eit døgn etter valden stoppa

Først eit døgn etter at valden stoppa, skal mennene ifølge tiltalen ha sørga for at den fornærma mannen fekk helsehjelp.

For dette er dei tiltalt for å ha sett igjen ein annan i hjelpelaus tilstand. Begge nektar straffskuld for dette.

I ein rullestol tok ein av dei tiltalte mennene den fornærma mannen med seg til eit legekontor.

Da blei politiet varsla av helsevesenet og mannen køyrd til St. Olav hospital.

Dei to mennene er også tiltalt for å få ein tredje person til å truge den fornærma mannen til ikkje å møte i retten i saka om dei andre lovbrota.

Den fornærma mannen fortel at han i ettertid har vore redd for at noko skal skje.

– Eg er redd for at nokon skal dukke opp på døra mi og gjere meg noko.

Også tiltalt for ran

Påtalemakta har også tatt ut ein annan tiltale som skal bli behandla av tingretten i same rettssak.

I denne tiltalen er den tiltalte mannen i 20-åra saman med to andre menn tiltalt for ran og trugslar.

Denne hendinga skal ha funne stad eit år før valdshendinga.

Denne saka er formelt ein del av same rettssak som valdshendinga og fridomsrøvinga, men blir behandla først neste veke.