Siste sjanse til å bruke snøen: – Kan bli ganske vått

3 hours ago 5

Om du likar å gå på ski, bør du nytte høvet mens snøen framleis er der. For i dagane etter helga blir det mildt og vått.

SNØ: Det var bra med snø på Løvlia skistue, i Oslomarka mellom Hønefoss og Oslo, fredag. Foto: Thomas Evensen / TV 2

Publisert 10.01.2025 13:14 Sist oppdatert 4 minutter siden

Sidan nyttår har det kome store snømengder over store delar av landet.

Dermed har det vore mogleg å finne fram akebrett og ski, også om ein bur midt i storbyen.

Til helga får du kanskje siste moglegheit til å nyte himmelens korrekturlakk på ei stund. Eventuelt er det berre eit par dagar med liding til – alt etter om du likar snø eller ikkje. Uansett så blir det mildvêr og regn for store delar av landet neste veke.

– Kaldt og klart

– I Midt-, Vest- og Øst-Noreg blir det ganske fint. Det skal vere kaldt og klart på laurdag spesielt, og også store delar av søndagen, før det går over i mildvêr, seier statsmeteorolog Emili Carin Rønning i Meteorologisk institutt.

– Så vil det søndag kveld og natt til måndag kome regn på Vestlandet og i Trøndelag, seier Rønning.

I Nord-Norge vil det kome nokre snøbyer, før det på søndag blir mildare, særleg i Nordland og sør i Troms, fortel Rønning.

Ventar snøsmelting

I starten av neste veke kjem mildvêret.

– På måndag vil det kome ein del regn, særleg på Vestlandet. Då kan det lokalt kome 60 til 80 millimeter på eit døgn, slik prognosane er no, seier Rønning.

– Då kan det bli ganske vått fleire stader. Sidan det har vore kaldt og snø, er det nok ein del snøsmelting i vente, seier Rønning.

På Austlandet er det ikkje venta noko særleg med regn, men også her blir det milde temperaturar.

– Også på Austlandet vil det nok bli ein del snøsmelting. Då kan det nok bli ganske glatt og ein del vatn fleire stader, seier Rønning.

Plussgrader vil det også bli i store delar av Nord-Noreg, fortel meteorologen. Heilt nord til Troms kan det bli regn, medan det vil kome snø i Finnmark.

– Skiljet mellom pluss og minus går i Troms. Harstad vil nok få plussgrader og regn, mens Tromsø kan få sludd. Der kan det vere mildt på dagtid, før det frys igjen, seier Rønning.

Lokalt kan det kome mellom 20 og 40 millimeter med nedbør i Nordland.

Det er for tidleg å spå kva stader det vil regne mest, seier meteorologen.

– Prognosane er ikkje heilt sett i stein enno. Det er framleis litt uklart kor det vil kome mest nedbør, seier Rønning.