Secret Service har skote og drepe inntrengar

Ein mann i 20-åra blei søndag skoten og drepen av agentar frå Secret Service.

Det skjedde etter at han skal ha forsøkt å ta seg ulovleg inn i eit sikra område ved Donald Trumps eigedom Mar-a-Lago i Florida, ifølge Reuters.

Mannen å ta seg inn på området då han blei stansa av tryggingspersonell, opplyser Secret Service.

– Slepp bensinkanna og skytevåpenet

I ei fråsegn skriv Secret Service at personen blei observert ved nordporten til eigedomen.

Han bar på det som såg ut til å vere ei hagle og ei bensinkanne.

I ein pressekonferanse sundag morgon lokal tid opplyser sheriffen i Palm Beach at mannen var kvit.

– Han sette ned bensinkanna og heldt geværet i skyteposisjon, før han deretter blei skoten av ein betjent, seier sheriffen.

– Det einaste vi sa til han var: «Slepp bensinkanna og skytevåpenet.»

Ingen andre blei skadde

Secret Service opplyser at ingen andre blei skadde i hendinga, og at presidenten ikkje var på eigedomen då det skjedde.

Donald Trump oppheld seg i Washington D.C., ifølge Reuters.

FBI assisterer i etterforskinga, saman med Secret Service og lokalt politi.

– Vi vil jobbe på åstaden så lenge det er nødvendig. Vi ber personar som kan ha tips om å ta kontakt med oss, seier spesialagent i FBI, Charge Brett Skiles.

Politiet i Palm Beach seier at det framleis er mykje etterforsking som står att.

I tråd med etaten sine retningslinjer blir dei involverte Secret Service-agentane sette i rutinemessig administrativ permisjon i påvente av resultatet av etterforskinga, opplyser etaten på X.

Secret Service er den amerikanske tryggingstenesta som har ansvar for å verne presidenten og andre toppleiarar.

Stor eigedom

Donald Trump kjøpte eigedomen i Florida i 1985.

På 1990-talet gjorde han delar av området om til ein privat medlemsklubb med hotellrom, spa og selskapslokale, ifølge eigne nettsider.

Samstundes har familien eigne private bustaddelar på området.

Interessert i meir utanriks? Lytt til denne podkasten: