Rydd opp i økonomien før nyttår og set deg nye sparemål for 2026

4 hours ago 2

– Eg sparer til ny mobil!

Jenny Haldin er på bytur i lag med mamma Irene Flatnes Haldin. I handa held ho ein nytrakta kaffi frå kaféen like ved.

– Du ofrar ikkje takeaway for å nå målet?

– Nei, nå har eg brukt mamma sine pengar.

– Det er eit godt sparetips å bruke mamma sine pengar ...

– Ja, det er ganske fint.

Lenger nede i saka kan du lese kva sparemål andre har sett seg for det nye året.

Er 2026 året du endeleg skal få spart opp den bufferen eller skal få råd til draumeferien?

Og korleis var det med skattefordelar før nyttår?

Ekspertane gir deg dei ti beste råda på tampen av 2025 og for eit godt nytt økonomisk år.

Sjekk skattekortet

Først må du finne fram skattekortet du fekk midt i desember.

– Gå gjennom skattekortet og sikre at du har rett grunnlag for 2026, oppfordrar Lene Drange.

– Har du fått meir lån, kutta i pendlinga eller blitt forelder i 2025 kan trekket vere uriktig, seier Hallgeir Kvadsheim.

Ta ei ekstra vakt før nyttår

Frikortgrensa auka til 100.000 kroner i år. Er du student eller skuleelev? Ta ei ekstra vakt om du har tent under grensa i år, er rådet frå Kvadsheim.

BSU, aksjar og fond

BSU og eventuell IPS er neste på lista før nyttår.

– Har du fylt opp BSU-ein eller IPS-ein? BSU gir både god rente og skattefordel, seier Drange

Dersom du eig aksjar eller fond utan aksjesparekonto må du hugse at gevinst eller tap blir skattepliktig eller gir frådrag når du sel dei.

– Har du uansett bestemt deg for å selje kan det reint skattemessig lønne seg å selje dei som har sokke i verdi før nyttår, så får du utnytta tapsfrådraget så tidleg som mogleg, seier ho.

Mange bekkar små

Så skal det ryddast.

– Før nyttår er eit godt tidspunkt for å avslutte strøymetenester, forsikringar eller avtalar du ikkje bruker, seier Drange.

Få oversikt over gjeld og renter

Fram med papir og penn. Logg på og gå gjennom gjeld og renter.

– Å reforhandle eller samle dyr gjeld før nyttår kan gi økonomisk gevinst med ein gong, seier Drange

Ok, då skal du vere klar for det nye året:

Lag budsjett for 2026

Eit enkelt budsjett gir kontroll, er rådet frå Drange.

– Ei god rettesnor for kvardagsøkonomien, seier Kvadsheim.

Og nettbanken har gode funksjonar for å få oversikt over forbruk.

Fast trekk

– Det gjer sparinga til ein vane og ikkje eit val du må ta kvar månad. Og bygg buffer. Ein til tre månadslønner gir økonomisk tryggleik og reduserer behovet for dyr kreditt når noko uventa skjer, meiner Drange.

Tving deg sjølv med usynleg sparing, altså automatisk trekk, er Kvadsheim sitt råd.

Sett økonomiske mål for året

– Det kan vere å betale ned ein bestemt sum gjeld, spare til bustad eller ferie. Eller få betre kontroll. Tydelege mål aukar sjansen for å lukkast, seier Drange.

Dette skal folk spare til i 2026:

Marthe Synnøve Susort Johannessen / NRK
Thomas Ueland
– Målet er å spare opp til eit nytt soverom i huset vårt.
– Kva er dine beste sparetips?
– Finn ut kva du har lyst til og kva du er villig til å ofre for å nå det. Så er det eigentleg berre å byrje å sette av pengar. Når eg står på butikken plar eg tenke: dersom eg ikkje kjøper dette, så kjem eg litt nærare målet. Det er dei små tinga som hjelper deg på veg mot sparemålet.
Marthe Synnøve Susort Johannessen / NRK
Silje Hafstad Stokka
– Eg skal snart ut i permisjon og skal spare til eit par månader utan inntekt.
– Kva må du ofre?
– Det blir fort ting til meg sjølv. Nå har vi snart fire barn, men vi prøver å kjøpe brukt. Så har vi snakka i mange år om at vi skal ha eit skikkeleg matbudsjett. Ein vakker dag, så skjer det.
Marthe Synnøve Susort Johannessen / NRK
Irene Flatnes Haldin
– Eg sparer til buffer og i aksjefond. Til framtida.
– Kva for nokre gode økonomiske vanar har du?
– Eg har fast trekk frå lønnskonto til sparing kvar månad.