Ruth Kleppe Aakvaag underviste i biokjemi

Ho var alltid aktiv i tillitsverv ved UiB. Partipolitisk var ho engasjert gjennom Bergen Høyre.

Av Dag E. Helland, Lars Haarr og Rein Aasland

Ruth Kirsten Kleppe Aakvaag døydde 86 år gammal 4. desember 2024. Ho voks opp i Bergen og tok realfagsutdanning ved Universitetet i Bergen (UiB). Frå 1966 var ho vitskapleg assistent ved biokjemisk institutt og vart amanuensis og førsteamanuensis fram til 1991 i biokjemi. Saman med mannen sin, Kjell Kleppe, arbeidde ho med nobelprisvinnaren H.G. Khorana ved University of Wisconsin frå 1968 til 1970 og ved Massachusetts Institute of Technology i 1974. Arbeida omfatta kjemisk og biologisk syntese av arvestoffmolekyl og analyse av eigenskapane deira. Deler av desse arbeida gav grunnlaget for utvikling av PCR-metoden (Polymerase Chain Reaction). Metoden er viktig for medisinske og biologiske testar.