Remas julehjelp får stryk: – Rimeleg skamlaust

I ein reklamekampanje oppfordrar Rema 1000 til å donere til «Julehjelpa».

Inntekta går til familiar og enkeltpersonar med dårleg råd, for å lette på byrda i julehøgtida. Kampanjen er eit samarbeid med Frelsesarmeen.

I reklamen kjem også Rema 1000 sitt eige bidrag fram: «Vi gir 1 million», heiter det i reklamevideoar og plakatar i offentlege rom.

Oda Louise Toven kallar det lite sjarmerande at Rema 1000 «skryter» av eige bidrag når selskapet gjekk med 2,1 milliardar i overskot i fjor.

– Det er rimeleg skamlaust av Rema 1000 å bruke eit ukjend tal millionar på å fortelje oss at dei har gitt éin million til dei som er svoltne på julaftan. Det synest eg er lite imponerande og er ikkje god bruk av pengar, seier Toven.

Rema 1000 ønsker ikkje å oppgi den totale kostnaden ved marknadsføringa av kampanjen.

Toven formulerte først kritikken i ein kronikk i Aftenposten.

Toven er også kritisk til at støtta kan bli gitt i form av gåvekort i Rema-appen. Dermed kan pengane til slutt ende opp hos daglegvarekjeda igjen.

– Om dei har lyst til å bidra, tenker eg det er rett og rimeleg at dei også gir rabatt i form av avslag i prisen, særleg når dei oppfordrar vanlege folk til å spleise inn til deira eigen kampanje, så fleire pengar skal brukast til å handle mat hos dei sjølv.

På kampanjenettstaden blir det presisert at det er Frelsesarmeen som fordeler pengane.

Frelsesarmeen avgjer om pengane skal gå til gåvekort eller brukast til andre nødvendige formål.

– Lukter marknadsføring heile vegen

Trond Blindheim er dosent ved Høyskolen Kristiania og underviser i marknadsføring. Han meiner Rema 1000 sin kampanje eigentleg er eit salsgrep.

– Eg tenker at det er marknadsføring forkledd som velgjerd. Det handlar om å skape meir trafikk i butikkane for å gi ei større omsetning i julehandelen, seier Blindheim.

På den måten utnyttar Rema 1000 folks givarglede i julehøgtida, meiner han.

– Rema 1000 seier dei ikkje har nokon intensjonar om å tene pengar på dette.

– Haha, det blir som når grisen såg slaktaren. Eg har mine tvil.

– Eg synest opplegget luktar marknadsføring heile vegen.

Rema 1000: Ønsker å skape givarglede

At intensjonane til kampanjen blir trekte i tvil er trist, meiner sals- og marknadsdirektør i Rema 1000, Pia Melbye.

– Intensjonen vår er å skape givarglede til det viktige arbeidet som Frelsesarmeen gjer, seier ho.

Difor var det også nødvendig å bruke pengar på å finansiere marknadsføring av kampanjen, hevdar ho.

– Vi har ønskt inspirere til givarglede ved å bruke marknadsflatene våre til å spreie denne bodskapen, tilsvarande det vi gjorde saman med Frelsesarmeen i fjor.

Grunnen til at kampanjen opplyser om Rema 1000s bidrag handlar om openheit, kommenterer ho.

– Vi har ønskt å vere transparente på det vi gir for at det ikkje skal skape spekulasjonar, seier Melbye.– Dette kan jo også føre til at fleire handlar i butikkane deira. Ønsker de med denne kampanjen å skape profitt for eiga verksemd?

– Det er ikkje intensjonen vår. Intensjonen vår er å skape givarglede og merksemd om det viktig arbeidet Frelsesarmeen gjer, og det er det som har vore formålet.

Ho understrekar at det er Frelsesarmeen sjølv som bestemmer korleis midlane skal fordelast, og kan brukast til det Frelsesarmeen sjølv meiner er mest formålstenleg.

Fryktar at givarar får pes

Frelsesarmeen opplever at behova hos folk med dårleg råd er langt større enn det dei har ressursar til å gjere noko med, fortel kommunikasjonssjef i Frelsesarmeen, Geir Smith-Solevåg.

– Vi er glad for alle som er med å gi, oppfordrar andre til å gi, og hjelper oss å sette fokus på sosiale utfordringar, for dei er det veldig mange av, seier Smith-Solevåg.

Han seier at alle gode krefter trengst i dugnaden.

– Vår frykt er når givarar får pes for at dei ikkje gir nok, at det skal bidra til å demotivere i forhold til å framleis vere med på dugnaden. Vi treng at folk er modige, står i det og framleis er med på å støtte opp, for behova er veldig store.