Prega etter kjempenedturen: – Eg er lei meg

– Det er kjipt at det skal gå slik, seier ein tydeleg prega Kristoffer Eriksen Sundal til NRK.

Dei norske herrane var lenge med i medaljekampen normalbakkerennet i OL. Sundal hadde best sjanse før finaleomgangen. Han var nummer tre halvvegs.

Men i sitt siste hopp landa han på 105 meter, og blei nummer 10.

– Det er rart as, det er kjemperart. Eg er lei meg. Eg har kjend på mykje meistring, men akkurat no er eg veldig lei meg. Men det går vel over om 45 minutt tippar eg, men det er idrett, seier Sundal.

– Det blei litt under det me hadde håpa på, seier NRKs hoppekspert Maren Lundby.

– Stilen blei viktig her, og det visste eg på førehand. Eg dreit meg ut i finalen, legg han til.

– Skia sklei fort fram då eg landa, prøvde å halde meg over men klarte ikkje det. Trefte bakken hardt. Det er surt å tenkje på at med ein fin landing så hadde eg hatt noko på pallen å gjere, forklarar han.

Johann André Forfang blei best av dei norske skihopparane med ein 9.-plass. Tyske Philipp Raimund vann. Ren Nikaido frå Japan og Gregor Deschwanden frå Sveits delte bronsemedaljen.

– Hadde forventa meir

Johann André Forfang har ikkje prega toppen av resultatlista i forkant av konkurransen, men i finaleomgangen hoppa han 103 meter.

– For min eigen del tek eg fram min desidert beste hopping i dag, så det er eg veldig fornøgd med. Eg har ikkje funne heilt ut av bakken her.

– Men me som nordmenn hadde forventa meir.

Forfang mista faren sin berre dagar før OL starta i starten av februar.

Då han venta på poengsummen viste han handflata til kamera. Inne i hansken stod det «pappa».

Regjerande verdsmester i normalbakken, Marius Lindvik, viste god hopping i prøveomgangen, men trefte ikkje då det gjaldt. Med hopp på 103,5 og 104,5 meter enda han på 12.-plass etter å ha vore nummer ni etter første omgang.

Har slite denne sesongen

Lindvik blei utestengt i tre månader etter fjorårets skandale i VM i Trondheim. Noreg blei tatt for juks. Lindvik og lagkamerat Forfang har heile tida sagt at de ikkje kjente til manipulasjonen med hoppdressen.

Sidan hoppskandalen har det norske herrelaget slite sportsleg. Det har resultert i ein kvote på berre tre utøvarar, og ingen nordmenn har vore på pallen i verdscupen.

Den norske hoppgjengen har alt fått ei gullmedalje i meisterskapet:

Tysdag er det blanda lagkonkurranse i OL-byen Predazzo.