Opplevde ein brors verste mareritt: – Då visste eg kva eg skulle drive med

– Det hadde vore gøy å vite korleis han hadde reagert visst han visste kva eg skal ut i no.

Dei seier Endre Lykken til NRK like før han skal ut i høgdepunktet i karrieren. Fem år etter at han opplevde sitt største mareritt.

For i 2021 la Endre ut på ein treningstur som har teke han heile vegen til Paralympics.

– Då fann eg ut av toppidrett og det ein verkeleg brenn for, dempar sjølv dei mest ekstreme tinga i livet.

Blind frå fødselen

Heile livet har Endre Lykken vore tilnærma blind, med 2 prosent syn på begge auga sidan fødselen.

Likevel har fysisk aktivitet og langrenn vore ein stor del av kvardagen sidan han var liten.

Pappa til Endre, Thomas Lykken, fortel om eit skimiljø som alltid har tatt sonen godt i mot.

– Det å høyre at barna får tilbod om noko dei har lyst til å gjere er veldig flott. Alle vennane dreiv med idrett, kvifor skulle ikkje han? fortel Thomas om oppveksten til Endre.

Halvbroren Emil betydde mykje for Endre i kvardagen. Sjølv om han er eit par år eldre er han ein viktig støttespelar, både i løypa og på heimebane.

– Emil var veldig klar på at han ønska at Endre skulle drive med idrett, og syntest det var veldig stas å ha ein bror som var god på langrenn, fortel far Lykken.

Og Endre vart ein stadig betre utøvar.

Men med tenåra kom det store og vanskelege spørsmålet: Skulle han verkeleg satse på langrenn?

Midt i denne prosessen snudde livet seg opp ned. Valet vart enda klårare.

Berre 15 år

Familien dreg på hyttetur på Sjusjøen, slik dei ofte gjorde. Endre har planlagd sine treningsturar denne veka. Halvbroren er ikkje med.

Ein dag får familien ein telefon: Emil Lykken er funnen livlaus i si eiga leilegheit grunna overdose, 25 år gamal.

Endre er 15 år gamal då han får sjokkbeskjeden. Heilt knekt.

Han hadde planlagd ei rulleskiøkt den ettermiddagen. Og den fullfører han.

– Då var eg plutseleg ikkje i tvil: Då visste eg kva eg skulle drive med. Det her skal eg drive med i mange år framover.

Endre visste ikkje noko om broren sitt forbruk.

– Det var så mykje som kom brått på. Familien min hadde jo skjerma meg for det eigentleg heile livet mitt, fordi broren min ikkje ville at eg skulle vite det. Og det er eg takksam for, for eg var ein veldig ung gut då.

Far Thomas fortel kva som var bakgrunnen til å halde rusproblemet skjult for Endre.

– Vi vurderte han som for ung til å bli involvert i problematikken. Derfor kom det nok som eit enda større sjokk for han, dessverre. Men han brukte det som ein styrke, for dei hadde eit veldig godt forhold.

Sjokket og sorga var enorm, men treningsturane gjorde det enklare å halde hovudet klårt.

Ein støttespelar som er med uansett

No er Endre Lykken blitt 19 år, og er ein av landets beste parautøvarar i langrenn.

Broren er alltid med han i tankane.

– Det var ein veldig, veldig fin tid som skulle vart så veldig mykje lenger. Ein tenker meir på det fine ein hadde saman. Og det hjelp på å halde motivasjonen oppe, og drive med det eg gjer.

Prestasjonane i verdscupen denne sesongen har gjort at han har kvalifisert seg til det største ein utøvar kan oppleve.

– Mitt første mål var vel eigentleg berre å komme til Paralympics, no er det nådd. Og no er det vel berre å få eit så godt resultat som mogleg.

Og med seg til Italia får han mykje støtte heimanfrå.

– Familien min blir med nedover, ja. Både mor, far og kjærast og litt andre slektningar. Så vi blir ein fin gjeng. Så det gler eg meg veldig til. Det blir jo artig å kunne dele det med dei.

Endre Lykke skal først i aksjon på langrennssprinten tysdag, som du kan følge på NRK sine plattformer.