OL-roar Helseth har bestemt seg for å legge opp

Roar Martin Helseth frå Ålesund har bestemt seg for å legge opp. Det har 30-åringen skrive i ei pressemelding til Sunnmørsposten.

Sunnmøringen har delteke i OL både i 2020 og 2024.

Helseth skulle satse mot VM i Shanghai i haust, men har no bestemt seg for å legge opp.

Til avisa seier han at han hadde håp for sesongen, men at det dårlege resultatet i det siste har vore avgjerande for at han no gir seg som roar. Under verdscupen førre helg kom han langt bak dei andre i singelsculler.

Deltok i to OL

Helseth har i ei årrekke representert Aalesunds Roklub. Sunnmøringen har fleire pallplassar i verdscupen i roing og medaljar frå U23-VM. Han har også tatt ein rekke NM-gull opp gjennom åra og i 2021 fekk han også kongepokalen.

Under OL i Tokyo i 2021 deltok han i dobbeltfirar saman med Erik Solbakken, Oscar Stabe Helvig og Olaf Tufte. Der blei laget nummer 9.

Under OL i Paris i 2024 konkurrerte han i dobbeltsculler saman med Kjetil Borch. Dei blei til slutt nummer 10.

Både han og søstera Thea Helseth konkurrerte under OL i Paris.

Engasjement for havet

Sunnmøringen har også utmerka seg utanfor sporten.

I 2022 fekk han Ålesund kommune sin miljøpris for sin innsats med både å fysisk fjerne tonnevis med søppel frå havet, men også for å skape merksemd rundt marin forsøpling.