OL-helten song for full hals på Taylor Swift-konsert – da blei det bråk

Kontrastane kunne knapt vore større.

Søndag nedkjempa han det svenske stortalentet Truls Möregårdh og sikra OL-gull i bordtennis. Han stilte opp i Kinas fargar, eit blikk med laserfokus og i intervjusona etterpå var han alt anna enn snakkesalig.

Nokre månader tidlegare filma Fan Zhendong seg sjølv på Taylor Swift-konsert i Singapore. Kinesaren var iført både T-skjorte, hovudplagg og armband til ære for artisten.

Filmsnutten viste blant anna at han song for full hals til éin av dei populære songane til superstjerna, men oppmøtet til 27-åringen på konserten skulle vise seg å bli alt anna enn populært i heimlandet.

Han måtte rett og slett ut og forsvare seg.

I KOSTYME: Bordtennisstjerna stilte opp i t-skjorte fra Red-albumet og vennskapsarmbånd fra Swifts Midnights-album.

TOPP TIL TÅ: Hodeplagget var fra Reputation-æraen til Taylor Swift.

CRUEL SUMMER: 27-åringen sang høylytt til hiten Cruel Summer.

– Eg er berre ein vanleg mann

Zhendong var nemleg i Singapore for å spele ei bordtennisturnering, og nokre dagar etter konserten rauk han ut. Kritikarane meinte Taylor Swift-showet hadde skulda.

Heng Zhu, journalist i Beijing Radio og TV (BRTV), snakkar med NRK etter OL-finalen i Paris:

– Eg høyrde om det der, og eg synest ikkje konserten var eit stort problem. Særleg ikkje nå som han har vunne OL-gull, seier Zhu.

Men kritikken var faktisk så heftig at Zhendong sjølv rykte ut og forsvarte seg.

– Eg er berre ein vanleg mann, skreiv han, ifølge The Guardian.

– Eg har vanlege fritidsinteresser, eg har eit sosialt nettverk, og eg kjem til å halde fram med å vere tru mot meg sjølv, lydde meldinga vidare.

Kritikken gjekk på at Zhendong ikkje hadde orden på prioriteringane sine. Det vill han ikkje høyre noko av.

– Eg er ein idrettsutøvar som kjempar for landet mitt, og eg har ikkje slurva med noko på over ti år, stod det i meldinga han publiserte da det storma.

Ny Swift-melding

Journalist Heng Zhu meiner at òg idrettsutøvarar fortener å kunne kose seg på fritida.

– Zhendong er stor fan av Real Madrid òg. Og han er superfan av Cristiano Ronaldo, påpeikar han.

– Vi må tillate han å ha hobbyar. Eg vil ikkje at folk skal plage han om det, seier den kinesiske journalisten vidare.

NRK prøvde altså å få Zhendong i tale om konsertkritikken, men utan hell.

Kort tid etter la han likevel ut denne meldinga i sosiale medium, ifølge Pop Base:

Han la altså ved Swift-låten «The Alchemy» og skreiv «endeleg». Songtittelen viser til prosessen som gjer metall om til gull.

Og gull blir det altså med heim til Kina.