Mørk «avslørt» i mammarolla: – Ho smeltar hjartet mitt heilt

– Ja, eg har blitt litt mjukare siste året. Det er hyggeleg.

Smilet lyset opp i ansiktet til landslagsspelar Nora Mørk. Latteren sitt laust og stemma verkar mjukare enn vanleg.

Det er knappe sju månader sidan ho og sambuaren Jerry Tollbring blei foreldre for første gong til vesle Tyra.

Det er under to månader sidan ho gjorde comeback på landslaget mot Romania i Larvik. På heimearenaen til klubben ho spelte for i mange år fekk ho overdøyvande appluas, då speaker presenterte namnet hennar.

– Det var litt spesielt faktisk. Det gjekk eigentleg opp for meg når eg skulle springe inn. Jøss! Dette var litt større enn eg hadde sett for meg, seier ho litt rørt, men stadig med eit stor smil.

• Følg og høyr VM-kampen mellom Noreg og Angola på NRK Sport måndag 20.30!

– Som idrettsutøvar er man egoistisk

Slik har det ikkje alltid vore i møte med pressa korkje før eller etter kamp. Mørk er kjent for sitt tøffe ytre og aldri vore redd for å gi klart uttrykk for sine meiningar.

Ho vedgår at det å bli mamma har endra perspektivet hennar.

– Eg har jo aldri prioritert meg sjølv så lite som eg gjer no. Ho kjem jo før alt. Så det har endra veldig mykje, seier ho ærleg til NRK.

Mørk signerte nyleg ein ny kontrakt med sin danske klubb Esbjerg til ut 2028. Hennar svenske sambuar er proff på herrelaget i same klubb. Handballen og det å prestere best på bana har alltid hatt hovudfokus.

– Som idrettsutøvar er man jo relativt egoistisk. Men kva eg treng og kva kroppen min treng er veldig sekundært merkar eg.

Livet som småbarnsmamma inneber mange endringar i kvardagen.

– Det er utruleg kor lite søvn du treng for å kunne prestere på ei handballbane, så det har eg god erfaring med.

Måtte ha pause frå landslaget

34-åringen frå Oslo overraska alle då ho etter OL-gullet i Paris i fjor varsla at ho måtte ta ein pause frå landslaget.

Stor slitasje over lang tid og mange skadar med store smerter gjorde at kroppen trengte ro.

Knappe to månadar seinare kom gladmeldinga om at ho og sambuaren venta sitt første born. 7. mai i år kom Tyra til verda.

Ho legg ikkje skjul på at ho er ekstremt lykkeleg om dagen.

– Ja, sjølvsagt. Det trur eg alle som får barn syns. Eg er jo veldig glad for å vere i den situasjonen, og eg har det veldig bra. Ho har det veldig bra. Pappaen hennar har det veldig bra. Det er veldig stas.

Men det er også ein krevjande og ein annleis kvardag.

– Det er toppidrett på heimebane også. Det er berre å bore hovudet ned i sanden og jobbe på slik at ho har det best mogeleg.

– Den er ganske tøff. Mange ballar i lufta og planlegging som må til. Eg føler eg jobbar døgnet rundt, men det går veldig fint, fortel handballstjerna.

Fått mammaråd frå keeperlegenda

Mørk vedgår at ho var usikker på korleis det ville bli å kome tilbake til handballen etter at ho vart mamma.

– Eg har jo vore ute i lengre periodar tidlegare, men dette var noko anna. Så eg var litt spent på korleis kroppen reagerte og vart vel eigentleg litt meir sliten av vanlege ting enn det eg brukar å vere.

Mørk fortel vidare at no må ho legge opp treningsøktene etter kva som passar «sjefen» på heimebane.

– Men det er klart det er berre hardt arbeid og bite tenna saman.

34-åringen er langt frå aleine på landslaget som småbarnsmamma. Veronica Kristiansen blei mamma for andre gong i januar til Odin og har frå før dottera Olivia på to år.

Ho har sett at noko har skjedd med lagvenninna etter at ho vart mamma.

– Ja, det har eg. Det er helt riktig det ho seier om seg sjølv. Eg ser også ei mjukare side av Nora no enn tidlegare og det synst eg berre er koseleg. Tidlegare år så har vi aldri snakka om barn saman.

Katrine Lunde har over ti års erfaring som toppidrettsutøvar og mamma.

– Ja, man endrar seg jo på ein måte når man blir mamma, fordi man får andre ting man skal prioritere litt høgare enn seg sjølv. Men det er jo ein fin ting å kunne få lov å vere litt meir sårbar og vere så heldig å ha ein liten baby.

Ho har likevel valt å gi nokon gode råd til lagvenninna på landslaget gjennom mange år.

– Det har eg faktisk. Ho må ta vare på seg sjølv og passe på at ho får like mykje mat og ro som dottera.

Mørk er glad for alle tips frå dei andre småbarnsmødrene på laget.

– Ja, det er jo nesten heil barselgruppe her no, så det er mange som har gode tips. Eg har jo enorm respekt for dei jentene som har gjort det før meg.

Babyknappen bra for å kople av

Esbjerg-stjerna ler høgt når ho bli konfrontert med sitt litt tøffe ytre og meiner at det eigentleg er ei misforståing.

– Eg har alltid vore ganske mjuk sånn på privaten. Eg er litt sånn hønemor, meiner ho sjølv, før ho raskt legg til;

– Ho smeltar jo hjarte mitt heilt og det visste eg jo på førehand kom til å skje. Men utad er det jo eit hardt ytre som eg liksom skal ta vare på då, seier ho og ler hjarteleg.

Under starten av VM i Tyskland i byen Trier har Mørk med seg mamma som barnevakt. Ho meiner at det å ha med seg dottera også kan vere bra for å kople av alt presset rundt det som skjer i VM.

– Ja, absolutt. Det syns eg også, når eg har starta opp att.

For dottera bryr seg lite om mamma har spelt ein god kamp eller kjem heim frå ein heller dårleg dag på parketten.

– Då er det berre rett tilbake å vere mamma. Den av-knappen har eg aldri brukt i særleg grad, men nå blir det jo babyknappen og det funkar bra det.