Krisetal for SV: – Dette er ei ræva måling

Ein må 9 år tilbake for å finne ei dårlegare NRK-måling for Sosialistisk Venstreparti (SV).

– Dette er ei ræva måling, 4,1 prosent er altfor dårleg, seier Haltbrekken.

Talet er henta frå januarmålinga som Norstat har gjort for NRK, Vårt Land og Dagbladet.

Alle endringane sidan desembermålinga er innanfor feilmarginen.

Med nedturen i stortingsvalet i haust og ei etterfølgjande sjølvransaking bak seg, er ikkje Haltbrekken overraska over at partiet gjer det så dårleg.

Nektar for krisestemning

No trøyster han seg med at det er lenge til neste val.

– Dette er eit klart signal om at vi er nøydde til å skjerpe oss kraftig, seier Haltbrekken.

Slik ser utviklinga til partiet ut frå januar 2022:

– Er det krisestemning i SV?

– Nei, det er ikkje det.

– Har de eit leiarproblem?

– Nei, men det er klart at vi i leiinga har eit ansvar når vi gjer så ræva målingar som vi har gjort no.

– Så det er ikkje snakk om å rokere på leiinga?

– Nei.

Har Raudt strigla seg opp?

Raudt, ein av SV sine største utfordrarar, har aldri før vore så mykje større enn SV som i denne målinga. I alle fall om ein ser på NRK sine målingar tilbake til 2013.

Raudt er i tillegg landets fjerde største parti.

– Det er veldig hyggeleg å lese. Folk er nøgde med at Raudt gjer det vi lova før valet, og vi skal bruke styrken vår til å skape endring for folk, seier Raudt-leiar Marie Sneve Martinussen.

– Nokre hevdar at Raudt har strigla seg opp litt og flytta seg litt meir mot sentrum, og slik klart å fange opp fleire veljarar. Er du einig i det?

– Nei, ikkje i det heile tatt. Vi har heile tida jobba på same måte. Eg trur mange ser at vi prioriterer viktige saker som betyr noko for kvardagsøkonomien til folk. Det trur eg trengst i den verda vi lever i, seier Martinussen.

• Her kan du leike deg med enda meir målingsstatistikk om du vil!

Borgarleg fleirtal, trass Ap-framgang

Arbeidarpartiet (Ap) er det største partiet på denne januarmålinga, og er også partiet som rykker mest fram frå desember.

Det gleder statsminister Jonas Gahr Støre som seier målinga er «motiverande».

Sidan førre måling har USAs president Donald Trump både tatt Venezuelas president Nicolás Maduro til fange, trua med tollauke og med å ta Grønland med militærmakt – og så trekt trugslane tilbake.

I tider med mykje internasjonal uro har veljarane ein tendens til å slutte opp om den sittande regjeringa. Dette kallast «rally round the flag»-effekten. Om Ap-framgangen kan tilskrivast denne effekten, er uvisst.

Trass dette, hadde ikkje Støre klart å danne fleirtal om det var val i dag med dette resultatet.

Så sjølv om både Frp og Høgre går tilbake på denne målinga, og Venstre på ny er under sperregrensa med 2,7 prosent, så er det borgarleg fleirtal med knappast mogleg margin.