Krev milliardar av kommunen: – Ein konsekvens av politiske skandalar

– Saksbehandlinga har vore ulovleg og det har blitt gjort saksbehandlingsfeil.

Det seier Anders Flaatin Wilhelmsen som representerer dei tre utbyggarselskapa i retten.

– Dette er ein konsekvens av politiske skandalar og skiftande maktforhold, seier han om søksmålet på 2,55 milliardar kroner.

I 2014 vedtok politikarane i Trondheim at området på Overvik aust i Trondheim kunne byggast ut.

Men ti år seinare, etter mange diskusjonar og utgreiingar, snudde politikarane og verna området frå utbygging.

Utbyggarane meiner at vilkåra for erstatning er oppfylt. Kommunen er totalt ueinig.

– Kommunen har tvinga saksøkarane inn i ei einvegskøyrd blindgate

Overvik var områderegulert til bustadbygging, men blei ført tilbake til landbruksføremål av politikarane i 2024.

– Dette var uføreseieleg og i strid med sterkt grunngjevne forventningar hos utbyggarane.

Saksøkarane meiner tilbakeføringa av området kom for langt ut i prosessen og at kommunen då er erstatningspliktig.

– Saksøkarane krev ikkje å få bygge ut. Det har politikarane i Trondheim bestemt at ikkje skal skje. Saksøkarane krev erstatning for det tapet dei lid som ein konsekvens av dette valet, seier Wilhelmsen i retten.

Onsdag legg han fram utbyggarane sin påstand og krav i retten. Torsdag er det kommuneadvokaten sin tur.

– Kommunen har tvinga saksøkarane inn i ei einvegskøyrd blindgate, legg Wilhelmsen til.

Advokaten meiner at politikarane sitt vedtak om tilbakeføring av området er i strid med plan- og bygningslova.

– Det er ikkje berre ein gal prosess etter plan- og bygningslova. Prosessen er ikkje gjennomført etter plan- og bygningslova i det hele tatt, seier Wilhelmsen.

Advokaten viste så til ei fersk utsegn frå Kommunal- og distriktsdepartementet om forholdet mellom reguleringsplan og kommuneplan.

Departementet skriv at ein kommune ikkje kan endre ein reguleringsplan dersom det bryt med plan- og bygningslova.

Meiner forventninga er like sterk som ein skriftleg avtale

Saksøkarane meiner at dei hadde ei rettmessig forventning til at dei skulle få bygge ut.

Dei vektlegg mellom anna eit tett samarbeid med kommunen og at det var utbyggarane, og ikkje kommunen, som utarbeidde områdereguleringa.

– Det skaper eit grunnlag for ei forventning som må vere minst like sterk som om ein hadde nedfelt det i eit formelt avtaledokument, seier Wilhelmsen.

Saksøkarane seier det ikkje var ein formell avtale om dette, men at det liknar eit avtaleforhold.

– Spørsmålet er kven skal bere den økonomiske risikoen for dette politiske spelet i Trondheim kommune? spør Wilhelmsen i retten.

– Vårt syn er at sjølvsagt er det kommunen, svarar han sjølv.

– Ein rein snuoperasjon basert på dei same omsyna

Utbyggarane meiner at politikarane kom til to forskjellige avgjersler om området basert på den same informasjonen.

– I denne saka har det ikkje skjedd noko nytt. Det er ikkje noko ny kunnskap som grunngjev denne snuoperasjonen, seier Wilhelmsen i retten.

Han viser igjen til at politikarane vedtok i kommuneplanen sin arealdel for 2012 til 2024 at området på Overvik skulle brukast til utbygging.

Og at politikarane vedtok at området skulle førast tilbake til landbruksføremål i ny arealplan for 2022 til 2034.

– Det er ein rein snuoperasjon basert på dei same omsyna, seier Wilhelmsen.

I tillegg viser Wilhelmsen til at området og den dyrka marka på Overvik har blitt frådelt i ulike tomter og kjøpt av eigedomsutviklarar.

– Det er i realiteten ein ekspropriasjon. Eigedommane blir relativt sett verdilause.

I tillegg å meine at det bryt med plan- og bygningslova, hevdar Wilhelmsen det også er brot på paragraf 105 i grunnlova, samt artikkel 1 i menneskerettslova.

– Dei skal ikkje drive med landbruk. Så effekten av dette for dei er at dei i realiteten blir fråteken sin eigedomsrett, seier Wilhelmsen.

– Og det tilseier at saksøkarane her blir tilkjent erstatning, konkluderer han.