Kan få studie­poeng av å gå på folke­høgskule

– Det verkar som ein fin ting, som opnar for fleire moglegheiter i framtida, seier Ingrid Braathu.

Ho går Explore Friluft ved Solborg folkehøgskule i Stavanger som har landa ei unik avtale med Universitetet i Stavanger.

Folkehøgskulen er først ut i landet med ei slik ordning, der elevane frå hausten av kan søke seg vidare til Universitetet i Stavanger og få heile 35 studiepoeng i friluftsliv godkjend for eit år på folkehøgskule.

Poeng som elevane kan ta med seg vidare i høgare utdanning om dei søker høgare utdanning ved Universitetet i Stavanger.

Den kristne folkehøgskulen midt i Stavanger har fått fagplanen godkjent av universitetet.

– Vi skal halde fram med å vere folkehøgskule, men så er det veldig kjekt at Universitetet i Stavanger anerkjenner fagplanen vår og kan godkjenne den til studiepoeng, seier Johannes Sjursen, som er friluftslivslærar ved Solborg folkehøgskule.

Det er onsdag morgon og elevane er samla for dagens undervisning, som er kuldebading.

Læraren startar med litt teori og testar elevane i kunnskap inne i saunaen.

Så er det rett ut i det kalde vatnet.

Folkehøgskulane er splitta

NRK har kontakta 21 folkehøgskular over heile landet.

Fleire av desse seier til NRK at dei er i for ei slik ordning, og kan sjølve tenkje seg å innføre det same.

Samstundes er Folkehøgskulane delte om innføringa, der nokre er kritiske til ei slik ordning. Fordi dei meiner dette vil bli ei indirekte akademisering av folkehøgskulen.

Eit tydleg skilje

Ved Campus på Universitetet i Stavanger nyt Åge Vigane morgonsola.

Han er førstelektor for friluftsliv ved universitetet, og hadde ideen om samarbeidet med Solborg folkehøgskule.

Han delar ikkje bekymringa om akademisering av folkehøgskulen.

– Dette kan vere med på å gje fleire ein betre overgang til høgare utdanning, seier Vigane.

– Vi gir ikkje ut studiepoeng

Det var saman med rektor på Solborg at Vigane fekk landa den unike avtalen.

Og rektoren avviser at dette er ei akademisering av folkehøgskulen, slik nokre folkehøgskular fryktar.

– Vi gir ikkje ut studiepoeng. det er universitetet som skal vurdere det, seier Halvard Aase, rektor ved Solborg folkehøgskule.

Men rektoren har trua på at tilbodet kan vere positivt for elevane.

Folkehøgskolerådet: Eit klokt val

Anne Tingelstad Wøien i Folkehøgskolerådet peiker på at viktig det er med tydelege roller i utdanningsløpet.

– Det er difor viktig at det er tydelege skiljelinjer slik at det er UiS, eller eventuelle andre universitet- eller høgskolar, som vurderer at kvaliteten og relevansen av det faglege opplegget til folkehøgskolen er så godt at dei vel å gi studiepoeng for dette, seier Wøien.

Ho meiner samarbeidet viser at folkehøgskole kan vere eit klokt val.

– Det viser at det kan vere smart å velje folkehøgskole før vidare studiar. I tillegg kan det vere smart å velje folkehøgskole for å fullføre vidaregåande skole, eller velje folkehøgskole for å få eit år å vekse på og klargjere vegen vidare for seg sjølv, seier t. Wøien.

Frå praktisk undervisning til studiepoeng

Tilbake til elevane ved folkehøgskulen i Stavanger.

Dagens økt med undervisning går mot slutten. Og etter eit kaldt bad er det rett inn igjen i varmen.

– Det var kaldt, men ikkje så gale som eg først trudde, seier Sigurd Holden-Leira.

Sjølve rakk dei ikkje moglegheita om å få studiepoeng for å gå friluftsliv på Solborg, men elevane stiller seg positive til ordninga som møter dei nye elevane dette året.