IDF: Israel oppfordrar sivile til å forlate Rafah

Israel byrjar evakueringa av sivile i den austelege delen av byen Rafah sør på Gazastripa. Det melder nyheitsbyrået Reuters.

Det israelske forsvaret IDF seier at dei vil be innbyggarar i austlege Rafah trekke seg mot såkalla «utvida humanitære område» i kystregionen av Gazastripa.

Internasjonale og palestinske hjelpeorganisasjoner skal ha blitt informert om detaljane.

Israelske styresmakter har lenge sagt at dei planlegg ein invasjon av Rafah, der over ein million palestinarar lever under det som vert skildra som forferdelege forhold.

Israels forsvarsminister Yoav Gallant hinta søndag til at ein planlagt militæroperasjon i Rafah ville byrje innan kort tid.

FN: Vil kunne ende i nedslakting

Ein israelsk militæroperasjon i Rafah kan ende med ei nedslakting, åtvara FN sitt naudhjelpskontor (OCHA) forrige veke.

– Det kan bli ei nedslakting av sivile, og eit utruleg hardt slag mot humanitære operasjonar på heile Gazastripa, sa OCHA sin talsmann Jens Lærke på ein pressekonferanse i Genève torsdag.

Han understreka då at hjelpeoperasjonane, som vert drivne frå Rafah, inkluderer helseklinikkar, sentralar for matdistribusjon og sentre for underernærte barn.

Ein representant frå Verdas helseorganisasjon (WHO) sa på den same pressekonferansen at det allereie er laga ein plan for kva som må verte gjort om israelske styrker rykkar inn.

Planen går mellom anna ut på å opprette feltsjukehus, men det vil ikkje vere nok til å hindre ein betydeleg auke i talet på døde.

Haaretz skriv at den israelske hæren sin operasjon i Rafah skal ha som mål å legge press på Hamas for å få på plass ei avtale om lauslating av gisla dei held på. Invasjonen skal altså ikkje ha som mål å ta kontroll over heile området.

Minst to familiar drepne i Rafah

Ifølge nyheitsbyrået AFP har det natt til måndag vore to israelske luftangrep mot to ulike stadar i byen Rafah.

Minst 16 palestinarar skal vere drepne i angrepa. Det melder AFP, som siterer dei palestinske helsestyresmaktene i Gaza.

Det er ifølge helsestyresmaktene snakk om sju drepne personar frå ein familie, og ni personar frå ein annan familie.

Ifølge Reuters skal ein baby vere blant dei drepne.

Opplysningane er ikkje stadfesta av uavhengige kjelder.

Tre israleske soldatar drepne i rakettangrep

Meldingane om angrepa kjem berre timar etter at tre israelske soldatar vart drepne i eit Hamas-angrep ved grenseovergangen Kerem Shalom mellom Israel og Gazastripa. Ifølge den israelske hæren vart ti rakettdrivne granatar sende inn mot grenseovergangen.

I tillegg til dei tre drepne, vart ni andre soldatar såra i angrepet med rakettdrivne granatar, som ramma både militær og sivil infrastruktur, opplyser hæren til avisa Haaretz.

Har stengt viktig passasje for naudhjelp

Kerehm Shalom ligg mellom Israel, Gazastripa og Egypt. Grenseovergangen speler ei viktig rolle for å få naudhjelp inn til Gaza, der millionar av palestinarar svelt etter sju månadar med krig.

Etter angrepet, som Hamas' væpna fløy har tatt på seg ansvaret for, stengde IDF grenseovergangen for lastebilar med naudhjelp.

Hæren øydela også oppskytingsrampene som vart brukte i angrepet.

Evakuerer sivile frå Rafah

Over 1 million fordrivne palestinarar oppheld seg i Rafah, ifølge FN.

USA har saman med Egypt og Qatar har lenge prøvd å få på plass ei våpenkvile mellom Hamas og Israel, nettopp for å unngå at Israel går inn i Rafah.

I den egyptiske hovudstaden har Hamas og IDF dei siste dagane vore i forhandlingar.

Innbyggarane i Rafah sa søndag til AFP at dei frykta at brot i forhandlingane om ei våpenkvile ville føre til meir vald i området.

– Vi trakkar på eggeskal, sa 59 år gamle Naja Shaat til byåret.

Dei siste dagane har det gått føre seg forhandlingar om våpenkvile, som Hamas seier no er avslutta, melder nyheitsbyrået AP.

Nektar UNRWA-sjef tilgang til Gazastripa

– Israelske styresmakter fortset å nekte FN humanitær tilgang, seier sjefen for FNs hjelpeorganisasjon for palestinske flyktningar (UNRWA), Philippe Lazzarini, i ei fråsegn.

Sist Israel nekta å la han sleppe inn i Gaza, var i mars. Då reagerte USA med å be Israel gjere om avgjerda. UNRWA har 13.000 tilsette på den krigsherja Gazastripa, der innbyggarane ifølge FN er trua av hungersnød.

– Denne veka nekta dei meg – for andre gong – tilgang til Gaza. Etter planen skulle eg vere saman med UNRWA-kollegaene våre, inkludert dei som står i frontlinja, skriv Lazzarini.

Samtalar

Natt til måndag diskuterte USAs forsvarsminister Lloyd J. Austin og Israels forsvarsminister Yoav Galland gisselforhandlingane, den humanitære hjelpa og Rafah.
Austin skal ha uttrykt si medkjensle etter meldingane om at tre israelske soldatar blei drepne i Hamas-rakettangrep.

Austin gjentok også USAs forplikting til å støtte Israels forsvar, skriv forsvarsdepartementet i USA i ei pressemelding.