Høyrde Arne Bye forklare seg: – Det er framleis ikkje noko anger

– Eg flirer jo litt av det han seier nokre gonger. Eg blir frustrert over måten han ser på det og at han ikkje ser realitetane.

Det seier Trine Haug, ei av dei fornærma, når ho høyrer forklaringa til sin tidlegare fastlege i Frostating lagmannsrett.

– Det var både godt og litt ekkelt. Alt på ein gong. Men det er greitt å høyre kva han seier, seier ho om forklaringa til Bye.

Arne Bye er dømd for både valdtekt og misbrukt av stilling mot Haug.

– Det er framleis ikkje noko anger. Han meiner framleis at det han har gjort er rett, seier Haug.

Fleire av dei fornærma følger saka digitalt heimanfrå, om lag 72 kilometer frå der Arne Bye igjen gjev si forklaring, no i Frostating lagmannsrett.

– Det er viktig at me får høyre det ordrett og sjå han, sjå uttrykka i ansiktet og kroppsspråket hans, seier Haug.

Den tidlegare kommuneoverlegen og fastlegen er dømd for 70 valdtekter og 82 tilfelle av misbruk av sin stilling som lege for å oppnå seksuell omgang.

I ankesaka skal lagmannsretten avgjere kva straff Bye skal få for desse lovbrota, som han er dømd for.

Ei lovendring gjer at han no kan få kortare straff:

Bye: – Høgst uetisk og ikkje akseptabelt

På dag to av tre i ankesaka i lagmannsretten forklarar Bye seg for retten.

– Eg føler eg har bidratt og eg har følt ansvar for å ta vare på befolkninga, seier Bye i retten.

Den tidlegare kommuneoverlegen seier han var redd for å oversjå noko i jobben som lege og at han ville vere ein garantist for folk si helse.

– Eg har bestandig sett på meg sjølv som ein slags garantist for folk si helse, seier Bye.

Men på grunn av frykta for å oversjå noko begynte han å filme konsultasjonane på legekontoret. På det meste filma han med opptil tolv kamera samtidig.

– Det er sjølvsagt noko som er høgst uetisk og ikkje akseptabelt.

– Ekstremt smertefullt når eg ser den belastinga eg har medført for veldig mange av dei fornærma, legg Bye til.

Haug som følger forklaringa frå Frosta, seier det var fint å høyre at Bye synest det er vondt å sjå smerta han har påført dei.

– Det er godt å høyre, seier ho.

I forklaringa si seier Bye også at undersøkingane han gjorde og utstyret han brukte var velgrunna.

Han brukte mellom anna delar av ein astmainhalator på gynekologiske undersøkingar.

– Eg skal ikkje gå så mykje inn på det, men eg følte det var eigna. Men dei sakkunnige var av ein annan oppfatning, kommenterer Bye.

– Føler du deg eigentleg, rett og slett, uskuldig dømd?

Etter Bye si frie forklaring fekk han fleire spørsmål frå både eigne forsvararar, aktor og bistandsadvokaten.

– Ser du på det som overgrep? spør aktor Eli Reberg Nessimo.

– Eg vil ikkje kommentere det med overgrep. Eg synest det er eit forferdeleg ord, svarar Bye.

– Tenker du på pasientane dine? Er du bekymra for korleis det går med dei? spør Nessimo.

– Ja, det kan eg trygt seie at eg er, svarar Bye.

Lagdommar Sven-Jørgen Lindsetmo tok ordet, lente seg fram og sette blikket i Bye, og stilte den tidlegare kommuneoverlegen fleire spørsmål.

– Føler du deg eigentleg, rett og slett, uskyldig dømt? spør lagdommaren.

– Nei på ingen som helst måte, svarar Bye.

Lindsetmo spør vidare kva Bye tenker om tingrettsdommen på 21 år i fengsel.

Bye gjentar at motivasjonen hans som lege har vore å bidra til folk si gode helse og tryggleik.

– Og då synest eg 21 år er svært lenge, kommenterer Bye.

– Han synest litt synd på seg sjølv

Samstundes som ankesaka går for retten, er fornærma Randi Vinge på dugnad i idrettshallen, i Frosta kommune.

Ho høyrer på medan hennar tidlegare fastlege forklarar seg på nytt.

– Eg føler at han synest litt synd på seg sjølv. At det er synd på han som har sete i fengsel så lenge.

Bye er dømd for valdtekt mot Vinge, men frifunnen for misbruk av stilling for å oppnå seksuell omgang mot ho.

– Han seier jo at han har hatt god tid til å tenke og at han lurer på kva han eigentleg har halde på med. Så det var veldig merkeleg, samanlikna med korleis han oppførte seg i tingretten, legg Vinge til.

– Synest du han verkar som ein angrande syndar?

– Nei, ikkje angrande. Han vil rettferdiggjere at han er så grundig og han meiner at det er tvang som fører til dei handlingane, svarar Vinge.

– Korleis hamna eg i denne situasjonen?

– Korleis har eg hamna i denne situasjonen? spør Bye seg sjølv i retten.

Deretter går han inn på det han ser på som tvangsliknande trekk hos seg sjølv, for å gje ei forklaring på dette.

– Eg ser jo det at min tvangsprega tendens til å gjenta ting og gjere ting unødvendig grundig, inklusiv filminga, har vore eit kjempeproblem.

I tingretten diagnostiserte dei rettspsykiatrisk sakkunnige Arne Bye tentativt med tvangsprega personlegdomsforstyrring.

Dette meiner psykologspesialist Kåre Nonstad er tydelegare etter å ha høyrd Bye si forklaring i lagmannsretten.

– Personlegdomsforstyrringa er klarare no enn ho var i februar 2024, seier han i lagmannsretten.

– Han søker perfeksjonisme, er oppteken av kontroll for å unngå angst og verkar noko pedantisk i forklaringar og rettferdiggjering, legg Nonstad til.