Høgsterett støttar synet til Naturvernforbundet i Kristiansand

Men fleirtalet i areal- og miljøutvalet i Kristiansand undergrev intensjonen i lova gjennom raus innvilging av dispensasjonssøknader.

Kristiansand kommune er blant dei kommunane her i landet som har bygd ned mest areal i strandsona, og dispensasjonspraksisen er ei viktig årsak til denne utviklinga. Naturvernforbundet i Kristiansand har gått gjennom dei dispensasjonssøknadene som er behandla i areal- og miljøutvalet dei siste åra. I 2025 blei heile 87 prosent av søknadane om dispensasjon i 100-metersbeltet innvilga, svært ofte i strid med faglege råd frå administrasjonen.

Når godkjenning av dispensasjonssøknader blir regelen i staden for unntaket, får vi ei bit-for-bit-nedbygging og mistar oversikten over utviklinga i området. Konsekvensane for naturen blir ikkje vurdert grundig nok, og positive vedtak kan skape presedens for ytterlegare nedbygging. Det verkar som areal- og miljøutvalet, med Høgre i spissen, ikkje legg tilstrekkeleg vekt på naturens eigenverdi, men berre vurderer bruksverdien.

Plan- og bygningslova krev mellom anna at fordelane ved å gi dispensasjon i strandsona skal vere vesentleg større enn ulempene. Dette er eit spørsmål om lovtolking, ikkje ei generell skjønnsmessig vurdering slik fleirtalet i areal- og miljøutvalet synest å leggje til grunn.

Naturvernforbundet i Kristiansand har ved fleire høve peika på at fordelar for ein utbyggar må tilleggast langt mindre vekt enn fordelar og ulemper av samfunnsmessig betydning. Dette er no stadfesta i ein dom i Høgsterett der det blir konkludert med at private forhold må tilleggast begrensa vekt.

Dommen, som gjeld ei sak i Bærum, slår også fast at tidlegare utbygging i eit område eller etablerte nabotiltak ikkje kan brukast som grunngjeving for dispensasjon. Advokatane Jarlsby og Vaboen skreiv for ei tid sidan eit grundig innlegg om høgsterettsdommen her i avisa.

Etter dette skulle ein tru at fleirtalet i areal- og miljøutvalet, med Høgre i spissen, ville ta dommen til etterretning og justere praksisen sin. Men det ser ikkje slik ut. Snarare tvert imot. Høgre prøver i staden å få endra lova. Fire stortingsrepresentantar frå Høgre har fremma eit representantforslag i Stortinget. Der ber dei om at det må bli lettare å få dispensasjon i «nedbygde og privatiserte område».

Naturvernforbundet er svært kritisk til ei slik lovendring. Også i privatiserte område kan det vere verdifull natur. Dei estetiske og økologiske naturverdiane, og den samla belastninga på naturen, må vurderast også der. Ei lovendring som foreslått av Høgre vil dessutan skape store tolkingsproblem og kan føre til at nedbygde og privatiserte område blir utvida bit for bit.

Naturvernforbundet oppfordrar areal- og miljøutvalet i Kristiansand til å ta den aktuelle høgsterettsdommen til etterretning og endre praksis i tråd med dommen og premissane.