Laurdag 31. august blir det stor ståhei i turistbygda Geiranger. Det er kjent at bryllaupsfesten til prinsesse Märtha Louise og Durek Verrett skal vere på hotell Union Geiranger.
I dokument frå politiet til NRK kjem det fram at vigselen skal skje utandørs. Nærare bestemt på Vinjevollen. Dette er eit naturskjønt område på ein gard like ved hotellet.
TV 2 og NRK har fått tillating til å filme med drone, men i vedtaket frå Møre og Romdal politidistrikt kjem det fram at det ikkje er lov å filme når gjestane kjem, under vigselen på Vinjevollen og under transport av personell med sikringstiltak.
Ukjent kven som kjem
Det prest Margit Lovise Holte som skal vie paret. Ho er ei venninne av prinsessa.
Bryllaupsfesten startar i Ålesund torsdag. På fredag skal gjestane dra med båt til Geiranger.
Det er ikkje kjent kven som er gjestar i bryllaupet, men det er venta at det kjem både kongelege og kjendisar frå inn- og utland.
Møre og Romsdal politidistrikt har budd seg på bryllaupet i lang tid og har bedt om ekstra løyvingar frå Politidirektoratet.
Politiet skal sikre og beskytte arrangementet dersom gjestar har krav på vern.
– Det er så viktig for meg, alle menneska som er til stades og kva dei bringer inn i bryllaupet av energi og kjærlighet, sa Märtha i ein podkast-episode av «HeartSmart Conversations» tidlegare i sommar.
Publisert 08.08.2024, kl. 10.34