Held renta i ro

– Prisveksten har tatt seg opp og vore klart høgare enn venta. Set vi renta ned for tidleg, kan prisane fortsette å stige raskt. Derfor held vi renta uendra no, seier sentralbanksjef Ida Wolden Bache.

«Prisveksten har kome mykje ned frå toppen, men er framleis over målet. Høg vekst i bedriftene sine kostnader vil truleg bidra til å halde prisveksten oppe framover.»

Samstundes skriv Noregs Bank at dei ser føre seg to kutt i år.

Altså meiner sentralbanken at styringsrenta vil ligge på 4 prosent ved nyttår.

Å halde renta i ro er i tråd med det dei fleste økonomar hadde venta på førehand.

9 av 12 bankar trudde at sentralbanken ville halde renta i ro, ifølgje ei oversikt frå TDN Direkt.

Tidlegare har Noregs Bank signalisert at dei ville senke renta i dag, men i det siste har tala i økonomien peika imot dette.

Prisane auka 3,6 prosent på eitt år, ifølgje SSB.

Noregs Bank har eit mål om at dette talet skal ligge på 2 prosent over tid.

I dagens rapport skriv Noregs Bank at dei ikkje trur prisveksten kjem med på 2 prosent før mot slutten av 2028.

Ein annan viktig faktor er at næringslivet ut til å vere positive og ha tru på gode tider. I tillegg er arbeidsløysa lågare enn sentralbanken tidlegare trudde den ville vere.

Noregs Bank sine vurderingar er no i tråd med det fleire økonomar her peika på. Økonomien går godt og ser ut til å tole rentenivået.

Trur det blir lenge til kutt

Analysemijøa i dei norske bankane har ulike prognosar for kva vi kan vente oss av Noregs Bank framover.

– Sjølv om det ikkje blir kutt no, så signaliserer dei rentekutt i løpet av året. Det vil føre til auka kjøpekraft for folk flest, i tillegg peikar lønnsveksten i retning av auka kjøpekraft. Så det kunne ha vore verre, seier seniorstrateg Dane Cekov i Sparebank 1 Markets.

Sjeføkonom Kjetil Olsen i Nordea Markets trur dei som ventar på rentekutt bør smørje seg med tolmod.

– Folk må forhalde seg til den renta dei har no ei god stund framover. Vi trur ikkje det blir rentekutt i det heile tatt i år, for vi trur norsk økonomi kjem til å handtere dette rentenivået ganske greitt, seier Olsen.

Han trur ikkje Noregs Bank kjem til å kutte renta før i 2027.

– Norsk økonomi har klart seg godt, arbeidsløysa er låg og i det siste har den gått ned, og prisveksten har gått opp og har vore mykje høgare enn Noregs Bank har anslått. Det er årsaka til at dei står i ro i dag, seier sjeføkonom Kjetil Olsen i Nordea Markets.